Ôi 3/1, Tỉnh uỷ Dak Nông ƀư Tâm nchră n’glôch jêh pah kan báo chí n’hanh nkhôm rnê giải Búa Liềm vàng năm 2024. Lah ta rơh lễ, wa Lưu Văn Trung, Groi Bí thư rnâng kan Tỉnh uỷ, Kruanh Hội đồng Nhân dân n’gor Dak Nông lah rjăp, báo chí, nkoch trêng nău lư ndrel hăn đah n’gor gay rlău du năm jêr jŏt, nsĭt geh âk nău dơi ta ăp ntil trong kan.

Tâm nê, ntoh lư lah Dak Nông hŏ ƀư geh nău dơi lễ nkah ndray 20 năm plơ̆ njêng tay n’gor n’hanh wơt dơn Huân chương Độc lập hạng Nhất; rnoh âk rvăt dŏng ndơ PCI bah n’gor hao 17 gưl, dâk tâl 21 lam dak. Ta tâm nchră n’glôch jêh pah kan báo chí, Tỉnh uỷ Dak Nông hŏ ƀư nkhôm rnê giải Búa Liềm vàng tâl 9, năm 2024 an 33 nău nchih dŭt uĕh blău bah 63 nău nchih râng tâm rlong. Nhih pah kan Radio nău ngơi Việt Nam way gŭ kan ta Nkual Tây Nguyên geh 3 ndơ nkhôm rnê ta ntil pơk ƀoh nău ngơi, lah: giải B đah nău nchih “N’hao đảng viên wăn grat ư̆r sĭt đah ƀon lan, nău tă gĭt ƀư bah Dak Nông”, giải C đah nău nchih “N’hao săk tam sinh hoạt chi bộ tâm nkual rnoi mpôl đê̆ ta Dak Nông” n’hanh giải Khuyến khích đah nău nchih “Bun dăp nău rŏng neh dak ma ăp mông nti n’har bri”.