Nar ntri (3/1), UBND n’gor Dak Lak kan nsum đah Hội Liên hiệp Bu ur n’gor ƀư Tâm nchră tâm dâl nău đah kruanh rđău kan UBND n’gor đah cán bộ, hội viên bu ur ăp gưl ta n’gor. Đah nkô̆ “Ntrŭt ntrôl tâm ban bu ur bu klô n’hanh ntik n’hao nău khlay kan bah cán bộ, hội viên, bu ur tâm hun hao wăng sa – rêh jêng kon nuĭh ta n’gor Dak Lak”, tâm nchră ƀư tâm mông nar khuh n’gôr, geh nău tâm ban, sŏng dăng.

Ăp nkô̆ nău geh tât trong đă tĭng, trong kơl gay ntrŭt nsôr, ntop kơl bu ur ntơm njêng nău kan hun hao wăng sa; rdâk njêng ƀon lan  mhe; tâm ban bu ur bu klô; đăp mpăn nău rêh jêng kon nuĭh an bu ur; pah kan cán bộ đah bu ur; trong nkra mât njrăng an bu ur n’hanh kon se…dơi âk nuĭh ntơh măt uănh khlay n’gluh nău ôp. Ntơh măt ăp n’gâng kan ta n’gor, n’gâng kan geh tât hŏ tâm ôp, tâm nkoch gĭt, ơh rblang na nê̆. Wa H Yim Kđoh, Groi kruanh UBND n’gor uănh năl, ăp nkô̆ đại biểu nkoch gĭt geh nău khlay duh ndal, ngăn ngăn, mpơl nău mât ŭanh bah bu ur đah ăp trong kan bah nău rêh, chính trị, lam nsum mpôl. Bah nê, năl gĭt ntŭk gŭ kan, ntŭk khlay kan, nău dơn kan bah bu ur tâm  ăp trong kan.