Thủ tướng Chính phủ Phạm Minh Chính ký nău ntrŭnh rđău đă mbrô 1/CT-TTg nar 3/1/2025 mpeh nău lor nchrăp trong ƀư đăp mpăn tŏng ăp điện rhŏ dŏng an nău kan ƀư njêng tăch rgâl n’hanh  nău rêh ƀon lan tâm khay dŏng âk tâm năm 2025 n’hanh lvang năm 2026-2030. Nău ntrŭnh đă lah kloh: Đăp mpăn tŏng ăp rnă ntêm ŭnh nar neh dak, pă an tŏng điện lah ngoăy tâm ăp jâng nsing đăp mpăn hun hao đăt ndal bah  jâng wăng  sa n’hanh n’glêh tât nău dơi n’gâng kan công nghiệp mhe, têh dăng mhe neh dak let năp tay.

Tĭng nê, nău hun  hao wăng sa  lam dak năm 2025 nsrôih geh tât rnoh 8% n’hanh hun hao wăng sa lvang năm 2026 – 2030 nsrôih ta rnoh 2 mbrô, ŭnh điện ân hao geh âk rlău 1,5 tơ̆, nchrăp rĭng ăp năm ntơm bah 12% tât rlău 16%. Gay lor nchrăp ăp trong nkra bah ơm, bah ngai, đăp mpăn mô an geh mô tŏng điện tâm ăp ntil nău kan, Thủ tướng Chính phủ ntrŭnh rđău đă ăp n’gor, ăp đơn vị rgum tĭng ƀư nău dơn kan pă an tŏng điện rhŏ dŏng hun hao wăng sa rêh jêng kon nuĭh lvang năm 2025 - 2030, đăp mpăn rnă ntêm ŭnh nar gưl neh dak tâm rơh hun hao mhe, uănh aơ lah nău dơn kan chính trị khlay mha êng. Rgum ra uănh tay, gŭ mĭn rgâl dăp rgum điện VIII gay ngăch gĭt ăp nău ŭch geh, rnoh tât trong nchrăp mhe mpeh hun hao wăng sa rêh jêng kon nuĭh; kơi ntop ăp tơm điện mhe, tơm điện mô n’huk djơh, kloh rsăch, jŏ jong.