Ta rơh rƀŭn tal 9, Hội đồng nhân dân n’gor Dak Lak khóa 10 mhe mbơh an Nghị quyết “Ntrŭnh nău ntop kơl tay đah cán bộ, công chức gưl xă, viên chức; nuĭh pah kan, nuĭh pah kan mô chuyên trách ta gưl xă rmeh yor dăp tay ntŭk kan hành chính gưl xă lvang 2023-2030 ta lam n’gor Dak Lak. Tĭng nĕ ăp nuĭh lah cán bộ, công chức, viên chức; nuĭh pah kan, nuĭh kan mô chuyên trách ta gưl xă, rmeh yor dăp tay ntŭk kan hành chính, mbra dơi ntop kơl tay du tơ̆ đah 50% dĭng lĕ prăk dơi geh tĭng nău ntrŭnh ta Nghị định mrô 29/2023 bah Chính phủ.

Năm ntop kơl lah 5 năm đah cán bộ, công chức, viên chức n’hanh 12 khay đah nuĭh pah kan, nuĭh kan mô kan jŏ jong, kơp bah rnôk nghị quyết bah UBTV Quốc hội mpeh nău dăp tay ntŭk kan hành chính gưl xă n’gor Dak Lak geh tam an dŏng. N’gâng kan Nội vụ n’gor Dak Lak an gĭt: n’gor dôl ƀư tĭng tay kơp uănh ăp nuĭh cán bộ, công chức, viên chức, nuĭh pah kan, nuĭh kan mô jŏ jong ta gưl xă rmeh yor dăp tay ntŭk kan hành chính gưl xă.