HĐND n’gor Gia Lai ntrŭnh nau mpeh kan kơl an cán bộ, công chức, viên chức ndrel nŭih pah kan dôl ma rmeh yor dăp rgum bah rmôt kan gưl xã lvang năm 2023-2025 mra geh kơl an âk ngăn 100 rkeh prăk/nŭih. Tĭng nau ntrŭnh, nŭih geh kơl lah cán bộ, công chức, viên chức rlu ranh lor năm mô lah nchlơi nau kan tâm 60 khay ndrel nŭih pah kan gưl xã ân rlu kan tâm 12 khay kơp ntơm nau ntrŭnh mrô 1195 bah Uỷ ban Rnâng kan Quốc hội mpeh nau rgum rmôt kan hành chính gưl xã bah n’gor Gia Lai geh nau tam (ntơm lơ 1/11/2024).

Ăp nŭih tŏng nau dơi mra geh ndơn ntop bah dih nau geh kơl an tĭng nau ntrŭnh bah Trung ương. Nau ntrŭnh lah nhoat hăn n’hêl bah n’gor Gia Lai tâm nau mât đăp mpăn nau dơi ân nŭih kan geh khuch, nkre ƀư săk tam nau kan ƀư rhuăt gleh rmôt pah kan hành chính./.