Tâm nău ntơh n’gôr rhơn di rơh vơt Noel năm 2024, kêng măng lơ 22/12, ndơn kan an nuĭh leo kan Đảng n’hanh Ngih dak. Groi Thủ tướng rnâng kan Chính phủ Nguyễn Hòa Bình lĕ tât rhơn Noel n’hanh năm mhe 2025 ta Tòa Tổng Giám mục Hà Nội, Tổng hội thánh tin lành Việt Nam mpeh Bắc n’hanh Ủy Ban Tâm rnglăp Công giáo Việt Nam. Tât khâl n’hanh rhơn Noel ta Ủy ban tâm rnglăp Công giáo Việt Nam, Groi Thủ tướng rnâng kan Chính phủ Nguyễn Hòa Bình mpơl tâm ba năp nơh, Ủy ban tâm rnglăp công giáo Việt Nam lĕ geh âk nău tâm rgop têh kuăng ta trong rdâk njêng nău tâm rnglăp lĕ mpôl rnoi, mô dơn tâm rnglăp ta ntŭk rêh jêng nău chroh ma lĕ tâm rnglăp đah ƀon lan mô chroh- kon chroh, tâm rnglăp đah Việt Nam n’hanh dak bah dih. Nău aơ lĕ geh ndâk nsơm nău tâm rnglăp lĕ mpôl rnoi- nău tă gĭt mpeh soan dăng Việt Nam. Nău tâm rnglăp lĕ mpôl rnoi lĕ ƀư an neh dak, mpôl rnoi he têh dăng n’hanh ntô̆ n’hao ta rơh rgâl mhe , rach năm mhe têh ndrŏng, sâm geh. Groi Thủ tướng rnâng kan Nguyễn Hòa Bình lah na nê̆, tâm nău dơi nsum nĕ geh nău tâm rgop bâh ƀon lan kon chroh Bap, ngăn lah bâh Ủy ban Tâm rnglăp Công giáo Việt Nam.