Kêng măng 23/12, ta Nhih pah kan Trung ương Đảng, Tổng Bí thư Tô Lâm hŏ wơt Đại sứ đặc mệnh toàn quyền Australia ta Việt Nam Andrew Goledzinowski tât ntĭnh sĭt. Ta rơh wơt, Tổng Bí thư rnê âk ăp nău rgop n’hanh nău nsrôih bah Đại sứ an nău ntrŭt ntrôl tâm boh bar dak tâm bah ri aơ, đah nău rgum tơm lah nău n’hao tâm boh bar dak hao tâm boh têh jong lam lĕ rngôch n’hanh mbah rhơn Đại sứ hŏ lôch jêh năm pah kan dŭt geh nău dơi ta Việt Nam. 

Ta trôm nău kan tâm boh lam lĕ rngôch, bar dak ân n’hao dăng tay nău nsing nơm chính trị n’hanh nkoch mpeh trong jong n’hanh nău mĭn đah ăp nkô̆ nău tâm nkual n’hanh lam ntŭr neh. Nkhêp geh rnôk dja, Tổng Bí thư mpơl nău lah uĕh Chính phủ Australia hŏ ntop kơl Việt Nam ta âk trong kan kơt dak si, n’hao mpôl mât đăp mpăn Liên hợp quốc, rdâng lơh đah rgâl trôk nar n’hanh ndơ̆ rgâl ŭnh nar, nta trong dơh an 350 rbăn nuĭh tơm Việt ta Australia; lah rjăp Việt Nam ŭch rŏng n’hao dăng lơn tâm boh, tâm brê đah Australia yor ma nău geh bah ƀon lan bar dak, tâm ban kơt nău rgop tâm đăp mpăn ta nkual n’hanh lam ntŭr neh.