N’gor Dak Lak hŏ nchrăp rlau 250 rbăn tấn puăch sur, djăr gay ma tŏng tăch tâm rnôk Tết năm mhe Ất Tỵ năm 2025. Ntŭk kan mât rong tâm nkuăl nchrăp ƀư âk nau kan gay ma đăp mpăn nau pă tăch ndrel nau nâp kloh tâm ntŭk tăch rvăt. Rnoh sur, kik djar bah lam n’gor Dak Lak rnôk aơ geh bơi tât 18 rkeh 500 rbăn mlâm, hao nklăp rlau du rkeh rđil năm e. Rnoh puăch sur geh 256.700 tấn, hao 11.700 tấn, tŏng nau ŭch geh dŏng sa tâm n’gor ndrel ăp nkuăl êp nê tâm rnôk tết dăch tât.

Wa Nguyễn Văn Hà, Groi Giám đốc N’gâng kan tuch tăm ndrel hun hao ƀon lan n’gor Dak Lak mbơh: ăp ntŭk tâm boh nau kan, ntŭk mât rong, rnăk rong tâm n’gor dôl n’hao rnoh mât rong gay ma năn geh tăch tâm dŭt năm. N’gâng kan hŏ rđau ăp rmôt kan geh tât n’hao nau njrăng rdâng srê ji tâm mpa rong, mêt uănh nau răk kloh ndơ sa tâm ntŭk mât rong rgum, ăp ntŭk tăch tơm gay ma năn nkân nâp kloh ndơ sa./.