Thủ tướng Phạm Minh Chính hŏ hăn ôp uănh trong nchrăp rdâk njêng, mpeh rƀŏng trong loih Lào Cai - Hà Nội - Hải Phòng nthoi Việt Nam đah Trung Quốc. Tĭng dăp rgum, trong loih Lào Cai - Hà Nội - Hải Phòng geh lĕ rngôch rnoh jong 417 km, hăn rlău 9 n’gor (Lào Cai, Yên Bái, Phú Thọ, Vĩnh Phúc, Hà Nội, Bắc Ninh, Hưng Yên, Hải Dương n’hanh Hải Phòng); nthoi đah ndrâm dak lêng hăn dak bah dih Hải Phòng, nthoi tâm ntêng lêng đah Trung Quốc; tŏng đah nău ŭch geh trong nchuăn rdeng âk ngăch, dơh soih n’hanh đăp mpăn.

Lôch rnôk djăt siƀŭt mbơh, Thủ tướng đă Bộ Giao thông Vận tải n’hanh ăp bộ, nhih pah kan geh tât ntrôl ngăch lơn đŏng trong nchrăp ƀư, tâm khay 1/2025 ân hao rblang dăn Chính phủ gay tâm khay 2/2025 hao rblang dăn Quốc hội trong nchrăp ntuh kơl n’hanh ăp trong kơl mha êng, dŭt mbrơi tâm khay 12/2025 ân ntơm ƀư trong loih dja. Thủ tướng đă gŭ mĭn tay, weh kơp tay mpeh rƀŏng trong, ăp ntŭk gŭ kâp, weh ƀư bah trong nchrăp n’hanh rƀŏng mpeh dŭt lâng, dŭt glêh, mô tĭng trong loih ơm ma nsŏng hăn tĭng trong mhe; rgâl rnoh âk n’hanh ăp ntŭk gŭ kâp ndeh tâm di.