Kêng măng nar prăm ăp pơh, ăp oh yuh rmôt bu ur ƀon H’Đing, xă Cư Dliê Mnông, nkuăl Cư M’gar, n’gor Dak Lak ndrel rgum mpêh kaoih răk wăr nkual ƀon lan gŭ. Đah nău nsrôih bah ăp yuh, trong hăn tâm ƀon jêng kloh uĕh, ăp mpêr n’gar dang nkao, ntŭk ntô gŭ âm uĕh nar lơ kloh nđĭr. Yuh H Nhi Byă, ta ƀon H’Đing nkoch: ăp rnăk tâm ƀon ton ƀư tĭng nău răk wăr ngih wâl, mô mât krŭng ndrôk rpu, sŭr djăr êp nkual gŭ âm n’hanh ƀa ƀơ mpêh kloh, dăp rep ngih wâl kloh uĕh.

Nsrôih mpêh koaih răk wăr ngih wâl nơm kloh uĕh, ndrel nti nsơm, nkoch nău blău ơm mpeh mât uănh ntŭk ntô gŭ âm kloh uĕh, mât nău uĕh rnoi nuĭh nơm.

Râng ntrong ƀư, ndrel đah mât răk ntŭk ntô gŭ âm kloh uĕh, ăp yuh hôm nsrôih hun hao wăng sa, tăm êng biăp, nkra tay n’hanh mât uĕh nău kan cheh tanh way ơm. Yuh H’Muôi Byă-Chủ nhiệm ntrong ƀư “Rnăk wâl đăp mpăn, nđĭr, kloh uĕh, ntơr ang” ƀon H’Đing an gĭt, bah ntrong ƀư aơ kơl oh yuh rgâl nău mĭn, nsrôih râng ƀư tĭng ăp rnoh ndơ ƀư mpeh “3 kloh”.

Ndơ̆ an tĭng nkô̆ nău, rnoh ndơ ƀư pah kan n’hanh tĭng nuĭh lĕ ký ton ƀư tĭng di trong ƀư lĕ n’gluh an. Bôk năp lah rgŏ jă kônh wa ndâk ƀư ntŭk ntô gŭ rêh kloh uĕh, ƀa ƀơ mpêh koaih ngih wâl, jâng gung, dăp rep ngih wâl kloh uĕh, uănh tĭng ndok nja, n’hŭch dŏng dŭng nilon. Ndâk ƀư, trơn ndrung wang ndrôk rpu, kik djăr ngai jay gŭ.

“Rnăk wâl đăp mpăn, kloh uĕh, nău way uĕh ơm” lah ngoăy tâm âk ntrong ƀư yor bu ur n’gor Dak Lak mbơh ƀư gay rƀŏng tĭng rơh rgŏ jă ndâk njêng rnăk wâl “5 mô 3 kloh”, “5 geh 3 kloh” yor Trung ương hội bu ur rgŏ jă. Tâm 3 năm bah năp, bu ur n’gor Dak Lak lĕ mbơh ƀư bơi 1.000 ndơ ƀư, gưl kan, rgum tâm ăp rnoh ndơ ƀư mpeh n’hŭch ach o, jay gŭ, ntŭk ntô gŭ âm n’hanh ntung trong. Ndrel đah nĕ, rmôt bu ur tâm n’gor  hôm rgop uĕh tâm nău nkra njêng, dŏng ndơ sông sa đăp mpăn, nkret gâm ndơ sông sa tâm ton đăp mpăn n’hanh mât uĕh ntrong ƀư mir biăp uĕh lăng. Wa Võ Thị Trang, Kruanh Rmôt bu ur xă Quảng Hiệp an gĭt:

Mpôl hên ƀư an 22 ntŭk nkra njêng, pă an, nkret gâm ndơ ngêt sa ký ton ƀư tĭng mpeh đăp mpăn ndơ sông sa, mât ƀư tĭng 200 ntrong ƀư tăm biăp uĕh lăng, tă bah nĕ rgŏ jă nuĭh, bu ur nkra njêng ndơ sông sa đăp mpăn Mât ntrong ƀư rwach rgum ndok nja gay ƀư Prăk nkrem ntop kơl bu ur ach o ta Chi hội thôn Hiệp Hưng”.

Bah meng ăp ntrong ƀư na nê̆, ntrong leo “3  kloh” hôm dơi Hội Liên hiệp bu ur ăp gưl n’gor Dak Lak ƀư pơk hvi tă bah ăp nău kan nkoch trêng, rgŏ jă nuĭh ƀon lan nkra n’hanh ndâk ƀư ntŭk ntô gŭ rêh uĕh kloh. Tĭng wa Lê Thị Thu Hiền, Kruanh Hội Liên hiệp bu ur nkuăl Cư M’gar, đah nău geh êng lah âk nuĭh rnoi mpôl đêt, nti nsơm mô tâm ban, rmôt bu ur ăp gưl nkuăl Cư M’gar lĕ kơt dŏng trong nkoch trêng đah nău uănh, kơt dŏng trong ƀư na nê̆ gay nuĭh bu ur dơh ƀư tĭng.

Ndâk ƀư trong nchrăp, rgŏ jă nkoch mbơh tât tĭng rnăk. Lăp tâm jay bah nuĭh tâm rmôt, bu ur, lah ngih wâl khân pơng mô hŏ kloh uĕh, mô hŏ dăp rep uĕh ri mpôl hên lăp ntĭm, ƀư ndrel đah khân pơng, ntĭm an khân pơng na nê̆ mô geh knŭng nkoch trêng dơm.

Ntrong ƀư “3 kloh” lĕ ndơ̆ an tâm rnoh ndơ ƀư 17.8 tâm bôk nău kan rƀŏng tĭng lam dak mpeh ndâk njêng thôn ƀon mhe, na nê̆ jêng ăp rnoh ndơ ƀư mpeh rnoh rnăk wâl geh jay ŭm, jay ăch chrach, ndơ n’gâr dak dŏng tâm di n’hanh đăp mpăn 3 kloh. Tă bah ƀư tĭng ăp ntrong ƀư, tâm 3 năm bah năp ta Dak Lak lĕ geh rlău 5.000 rnăk bu ur geh ăp rnoh ndơ ƀư. Wa Võ Thị Ngọc, Groi kruanh Hội Liên hiệp bu ur n’gor Dak Lak an gĭt:

Dăn đă jao an Rmôt bu ur dăn ƀư gưl kan n’hanh geh nău ntĭm rđău, ndăn geh kơl bah UBND nkuăl. Ntĭt nsa lah dăn đă gay ƀư nkoch trêng, rgŏ jă n’hanh ntop kơl ăp rnăk ndâk ƀư jay ăch chrach tâm di kloh uĕh, đăp mpăn “3 kloh” kơt dự thảo bôk nău rgop tâm nchră ma Hội Liên hiệp bu ur n’gor dôl sŏk nău rgop bah ăp nău kan gay mbơh an UBND n’gor.

Tă bah nău ƀư na nê̆ ntrong ƀư “3 kloh”, bu ur Dak Lak lĕ n’hanh dôl geh âk nău rgop uĕh tâm ntrong leo ndâk njêng thôn ƀon mhe ta ntŭk. Ăp nău ƀư na nê̆ bah nău mât răk kloh uĕh ntŭk ntô gŭ âm hun hao wăng sa nâp nâl, mô knŭng rgâl nău rêh ma hôm rgop ndâk njêng du nsum mpôl nâp dăng, ndrŏng uĕh.