Nau ŭch rŏng ma Wa Hồ ntĭm tât ăp ƀon lan, nau ŭch rŏng nê mô geh nau dơi tâm ntit ơm, ma lah ăp ntil, pơk hvi, mô geh nau tâm nkhah ma bu ur, bu klô, bu ranh, kon se, nkuăl ba lơ mô lah ba dâng, tât ăp nŭih geh bu lơh mbram ndrel nau khuch tâm lam ntur neh. Ăp nê kŏ geh tâm play nuih bah Wa. Kơt nau ndrĭng bah nhà thơ Tố Hữu:

            “Ơi wa moh play nuih wa têh hvi ngăn.

            Ut n’ăp neh dak ăp ntil nŭih”.

            Nhà thơ Cu Ba-Lisam-đơ-rơ-ô-tê-rô kŏ nchih:

            “Tâm play nuih wa mô hôm ŭch geh huân chương.

            Nuih n’hâm wa geh lam ntur neh”.

            Nau kan geh ntoh ăp đah ăp nau ƀư: ôp khala, bonh đă, rnơm rŏng ndrel mât kơl an ân kon nŭih. Nau nê geh ƀư rjăp bah âk nau jong ntơm bah rnôk kon se ân tât âk năm lôch nau rêh bah Wa. Nua ŭch rŏng bah Wa mra saơ kloh ngăn bah ăp nau ngơi, nau kan, nau ƀư dŭt n’hâm tâm di, tâm dăch. Kruanh Hồ Chí Minh bah nau nkoch bah kô rang “tât năm mhe pă ân bok” tât ăp kon se “trung thu pa ưnklâm ndơ”. Âk măng wa mô geh bĭch yor yŭ rmôt dân công “bĭch tâm bri” tât ăp nŭih tahen “dâk njrăng tâm n’har bri”. Uănh bu nkra trong jêr jŏt, wa mơ gĭt ndrel tâm nkoch đah nau ndrĭng:

            “Nkra trong geh âk nau jêr ngăn.

            Bri mih, duh nar mô geh rlu

            Rseh, ndeh bu năch hăn rlet ro

            Nkah nau lah ueh nŭih pah kan mô geh âk”.

            Rvê, kơl an ân công nhân, Wa lah: Mô kâp sŏk kđar ân Wa prot trong hăn trong klach ƀŏ ôh, ma nkra trong ân ăp oh nô công nhân nơm hăn prot trong nê mô hôm geh dal bok, dak ƀŏ”.

            Wa rêh ndrel nŭih ƀon lan kan lŏ mir nkualư yôk ach o ndrel geh âk nau jaka mpet đah nuih n’hâm ŭch rŏng:

            “Yŭ ngăn ăp nŭih hăn thay lŏ.

                        Jâng jot dak bok lôch nar jêr rgănh”.

            Đah kônh wa miền Nam, wa tă lah: Miền Nam mro tâm play nuih gâp” đah nau ŭch rŏng âk ngăn. “Du nar ma neh dak ê geh đăp mpăn, kônh wa hôm nau jêr ri du nar gâp sa mô kah, bĭch mô hăk”. Ê dơi geh rklaih đăp mpăn miền Nam, Wa uănh nau kan păng ê lôch. Ndri ma, Wa lah đah Quốc hội rnôk Quốc hội ŭch pă Huân chương Sao vàng an Wa “kâp tât rnôk nar miền Nam đăp mpăn, Quốc hội mra ân kônh ư ưa miền Nam pă Huân chương nê ân ma gâp”. Ăp rnôk geh nŭih hăn tă bah miền Nam khâl, Wa rhơn ngăn, vơt, ôp khâl bonh đă, pă ndơ, nklih rup.

            Mô knŭng ƀon lan Việt nam, Kruanh Hồ Chí Minh hôm gĭt kloh ngăn đah nau rêh bah nŭih pah kan ntô ôch ndrel ji nuih ngăn ma phung tâm nkhah rnoi mpôl, nkhĭt nŭih ntô ôch tât jêh nê ba kơi nê Wa nchih tay tâm n’ha báo “trong ƀư kơt Lin sơ”.

            Du nar nŭih Việt Nam rŏng dak, du hê tahen cộng sản lam ntur neh Nguyễn Ái Quốc mro kơl an nau tâm lơh bah công nhân ndrel ƀon lan ăp dak, kuăl jă nŭih cách mạng ngăn ƀư kan ngăn kơl an lơh rdâng bah ƀon lan Việt Nam ndrel ăp thuộc địa êng. Kơt nhà tơ Ấn Độ Mô-nin-dra-Ray nchih:

            “Hồ Chí Minh. Nŭih hŏ ndâk nau rêh.

            Păng lah ang trong.

            Dôl leo nau ang ân rnoi nŭih”.

Mpêt ngăn geh rđau kan geh nau ŭch rŏng ân ăp nŭih kơt nê. Lah Kruanh dak, yơn nau rêh ăp nar Wa ƀư da dê. Wa kơl an tât ntŭk gŭ, ntŭk kan, tât piăng sông, ao nsoh. Lah nŭih rđau kan têh bah du neh dak, mô ru ma rbăn nau kan, yơn moh nau ƀư, moh ntŭk gŭ ri play nuih Wa mro nkah tât ƀon lan.

Đah bri duh nar, ăp tahen trôk njrăng klơ chor ngih rƀŭn Ba Đình mô tŏng dak ngêt, Wa nơm hŏ prăk păng têm gay ma rvăt dak ngêt. Wa knŭng nsoh ao n’hơ, pă ngăn ao răm ân cán bộ bah nơm yor lah “bu ân răm tâm kơt ma nơm”. Rmot văn công hăn miền Nam tâm yan sial puh, oh nô ŭch ngăn rnôk nê lah phôi nah. Nê lah nau ŭch bah du rđau kan mro tâm dăch đah tahen ƀon lan, hôm nau ŭch rŏng ngăn bah nŭi mbŏ đah kon, sau.

Rnôk hôm rêh, Kruanh Hồ Chí Minh mro ŭch ma kon se jê̆. Wa uănh kon se lah bu năch jê̆. Wa ŭch, rnơm ndrel mât chăm. Wa nkah cán bộ, tahen ndrel ƀon lan “Nau kan bah nơm lah mhâm ƀư ân ăp oh geh piăng sông, ao nsoh, geh hăn nti”. Ăp tết trung thu Wa kŏ njoăl săm ƀŭt tât ôp khâl, bonh đă ndrel leo nau rnơm tâm kon se. Nau ngơi bah kon se tăch ndơ tâm mông ôi yan puh, Wa hŏ rŭng êng dak măt, yŭ kon se hăn kan.

Wa Véc-mét-tô-rê, ur Tổng bí thư Đảng cộng sản Pháp Mô-rít-tô-rê nkoch: “Hồ kruanh dak ŭch ma kon se. Hên saơ Kruanh ji nuih n’hâm rnôk nkah tât kon se bah Việt Nam yor phung rlăng in neh dal”. Ăp kon se kơp n’ăp ma kon se lam ntur neh kŏ ŭch ma Wa Hồ kơt lah Che nơm. Nhà báo A-min, nŭih Yê-men lah: Păng mô knŭng lah Wa, lah Mbŏ bah kon se Việt Nam ma hôm lah Wa, Mbŏ bah kon se lam ntur neh”.

Kruanh dak đah nau tâm dăch dơh ndrel nau ŭch rŏng kon nŭih hŏ lơi an âk nau nkah tâm nuih n’hâm ƀon lan Việt Nam ndrel băl bên lam ntur neh. Wa geh ak nau rŏng, nau rnơm ân druh ndăm, nŭih tơm bah neh dak. “Neh dak geh nâp đŏng lah mô lah yor bu mom”. Wa uănh bu mom kơt lah băl mpôl tâm rnăk vâl. Nau roh hoach bah druh ndăm mom ân nau tâm lơh kơl neh dak đăp mpăn lah nau ji tâm săk wa. Wa tă lah: “Ta Việt Nam, ăp nŭih geh du nau jêr êng. Ăp ngih geh nau jêr êng. Rgum nsum nau jêr nê lah du nau jêr, nau ji bah Wa”.

Rnôk tăng kon wa Vũ Đình Tụng khĭt rnôk tâm lơh, Wa nchih nau rngot: “Ăp druh ndăm Việt Nam kŏ lah kon se gâp. Roh du hê ri kơt lah gâp roh du gưl proch”. Lôch nau rêh wa uănh nơm lah tahen hăn tâm lơh tĭng nau đă bah ƀon lan, nŭih ƀư nau kan bah ƀon lan.

Mô êng knŭng geh nau tâm rŏng dŭt n’hâm, ntoh ngăn tâm Hồ Chí Minh lah nau ryơk, rnơm ngăn tâm n’hâm, nau mĭn bah âk rkeh kon nŭih. Nau ueh tâm Kruanh Hồ chí minh ntoh ngăn tâm ƀon lan, tâm rmôt kan geh nau dơi bah cách mạng. Wa mro uănh tât nau geh, nau rvê, nau mĭn ndrel nau ji bah rnoi nŭih. Tâm rnôk rhơn 56 năm, nuih n’hâm Wa mô m’ak yor miền Nam ê đăp mpăn. Rnôk nkah tât meièn Nam dôl rêh tâm nau rngot, Wa Hồ rŭng dak măt. Dak măt Mbŏ ranh bah rnoi mpôl ê geh rklaih, ê dơi dah rŏng. Ăp rnoi geh lơh, kon se ntô ôch ji ngot, du he ebu ur tâm dak Pháp geh bu nkhĭt kŏ ƀư Wa rngot ngăn.

Kơt nê ngăn kơt nhà thơ Việt Phương nchih: Play nuih ji dŭt n’hâm wa gŭ tâm ntŭk ngai ngăn ngên. Tâm nau rêh ăp nar, wa kŏ nkah tât neh dak, ƀon lan: Sa du mbâr kah kŏ rngot yor neh dak/ mô geh nau đăp mpăn rnôk ŭnh du n’ging kao si”. Wa yŭ ƀon lan nơm ach o. Kruanh dak knŭng gŭ tâm ngih kon jê̆, kho ao ơm, ngêt sa mô kâp kah, nau rêh tâm dăch ndrel mô ŭch ƀon lan mĭn tât nơm”.

 Mra dơi lah, nau rŏng kon nŭih bah Wa lah du nuih n’hâm ăp ntil nau mĭn, n’hâm, nau mĭn, play nuih geh nsum ma nau kan bah rnoi mpôl đah neh dak, ƀon lan. Wa hŏ roh 79 năm rêh ân nau geh bah ƀon lan Việt Nam ndrel lam ntur neh. Yor ŭch rnoi mpôl gehrklaih, ƀon lan geh đăp mpăn, bu mom Nguyễn Tất Thành 21 năm hŏ hăn lam ntur neh, ƀư âk nau kan gay kơl an neh dak. Yor nau rŏng kon nŭih lah nau nsŭk đă nau kan cách mạng mô rgănh bah Kruanh Hồ Chí Minh. Đah nau mĭn: Lah neh dak đăp mpăn ma mô geh dah rŏng ri đăp mpăn kŏ mô geh nau khlay’ Ndrel nau đăp mpăn bah wa lah ăp nŭih kŏ geh piăng sông, ao nsoh, geh hăn nti. Wa rđau kan lơh phung rlăng ji ngto, rlu, ƀư nau rêh mhe tâm rnôk tâm lơh.

 Lor ma roh, Kruanh Hồ Chí Minh lơi ân lam Đảng, lam ƀon lan nau nkah. Mô geh du nau êng, tâm rlau 1000 rplay, geh nkah ngăn tâm lôch 40 năm, Wa mô chuêl ƀon lan, mô chuêl nau kan bah neh dak. Ndrel dăch dŭt, nau khlay ngăn, rngot ngăn, Wa “lơi âk nau ŭch rŏng ân lam ƀon lan, lam Đảng, ân lam tahen, ân ăp bu ndăm ndrel kon se”. Wa khĭt mô leo du ntil ndơ ân nơm. Ăp nê Wa lơi ân rnoi mpôl. Rnơm nau roh hoach ndrel nau rŏng nê ma lĕ rnoi mpôl nhĭm rngot klâng Wa ngăn, nŭih geh rŏng rlau ma nŭih bu rŏng. Nau nkah ntĭnh jêng nau khlay bah rnoi mpôl, lah nau rgum, nau rgop ƀư jêng nau rŏng ŭch bah kon nŭih mro mrăng bah Kruanh Hồ Chí Minh./.