Tuk vak tapa, dom bhum bangsa takik di tỉnh Lâm Đồng hu salih janih phun pala biak siam lagaih. Rilo janih phun pala bahrau hu yaom kinh tế glong hu ba tame pala, dong ka mikva paglaong rai duik, pasiam veik bruk plaih cuang kandah tuk pagam pambak tame phun cà phê, phun padai. Dalam nan, pala dâu raong tằm hu tong yaom lac sa jalan ngak mbang lagaih, ba jien tame tani tanat, dong ka rilo boh sang yam tagok.

Urang  nong di Tây Nguyên dok rong dâu pala tằm 

2 thun tapa, meng di tuk ba bruk pala dâu raong tằm tame ngak, kinh tế sang saai  K’Du dok di palei 4, xã Tam Bố, huyện Di Linh (t. Lâm Đồng) hu tagok mboh di anak meta. Tok labaih 1 sào dâu lai pabak ginup pandap mbang rong  1 hộp tằm pajaih, bruk pala dâu raong tằm hu ba jien tani tanat ka sang saai K’Du, song yaom laba 8 triệu đồng/bilan. Saai  K’Du brei thau, hu yau nan meng hu bruk dong biak siam meng dom jabat chức năng song Kapul urang nong di huyện.“Hu Kapul urang nong huyện dong jien blei né, sang hu labaih  1 sào dâu piah rong tằm. Drei rong yaok mbang meteh paaop  tằm pajaih. Meng di tuk mai song bruk pala dâu rong  tằm, ye rai duik di sang drei hu tani tanat jang. Drei daok kuhria peih prong taneh pala dâu piah rong tằm hu rilo jang”

Dreih yau nan, muk Ka Đim daok di palei 2, xã Gia Hiệp, huyện Di Linh jeng hu ba kinh tế sang nao tagok meng pala dâu rong tằm. Tui muk Ka Đim, tui yaom kén tằm trun tagok meng  130 ribau  đồng tal 150 ribau đồng/sa kg yau urak ni, gia boh sang muk duah laba  hu labaih   10 triệu đồng sa bilan. “Sang drei hu 2 sào dâu lai pala dalam bein  cà phê piah rong tằm. Drei rong yaok mbang meng meteh paoap tal sa paoap tằm pajaih. Meng tuk pala  dâu rong tằm, kinh tế  sang tani tanat jang biak rilo”

Ong K’Xuyên, urang jakar pachreih nong  xã Gia Hiệp, huyện Di Linh, tong yaom: ngan song phun jien takik, payeng phun jien samar, pala dâu rong tằm lac sa jalan ngak lagaih song rilo boh sang urang bangsa  takik  dok pak ni. Lingiu di nan, bruk pablei tabiak mbuan lagaih, yaom kaom tani tanat, bruk pala dâu rong  tằm  hu mik va song karja pak ni iek prong:“Dalam dom thun tapa, palei khol dahlak biak iek prong bruk patagok kinh tế dalam bhum mik va bangsa takik, dalam nan hu jhul pakhang bruk pala dâu rong tằm. Meng rong tằm hu dong ka dom boh sang urang nong tuk halei jeng hu jien mek tame. Meng nan hu jien piah pala dom janih phun pala anek athur rong lavik harei karei karei kein laba jang. Urak ni, xã khol hulin  hu yaok rituh boh sang urang bangsa takik pala dâu rong tằm di taneh praong baih tih labaih 200ha”.

Tui danak dak patagok khang kajap gah dâu tằm tơ hu  UBND tỉnh Lâm Đồng brei adat, tal thun 2023, mblang taneh pala dâu tằm dalam tỉnh hu 10.000 ha, hala dâu mek hu 210.000 tấn, pabak ginup pajaih tằm siam pabak ka bruk sản xuất, tagok sản lượng kén tằm hu 14.500 tấn song sản lượng tơ tằm hu 1.900 tấn.

Gam song nan, Lâm Đồng jeng iek prong bruk padang dom chuổi pambuak gauk dalam sản xuất, pablei salih pandap, dong ka urang nong sahaneng hatai, tani tanat bruk ngak, paglaong yaom tơ tằm di pak ni. Danak dak ni daok hu peih ngak prong dalam, daong palagaih ka bhap bini bhum urang bangsa takik dalam  tỉnh yam tagok tabiak truh kathaot, pasiam rai duik bahrau./.

Urang lang: Hanipha -25/11

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân