VOV4.Bahnar - Tơdrong tơroi kră sơ̆ “Tơdrong rup tơmo” kơ hơdrung M’nông tơroi găh klo akăn ŭnh hnam dơnuh hơrih sa ‘lơ̆ng hơ iă. Mă lei ưh kơ pŭn ai răm kơ kiĕk pơrăm bơngai hơkăn ‘lơ̆ng klă klang rag kơđak, mă đơ̆ng bơngai klo pran jăng nuih mơng pơlôch kĕ kiĕk ră. Lăp đơ̆ng rŏng chă pơdong groong ƀŭ hơkăn đang, bơngai klo kơ yuơ ƀlŏk hơdơ̆r ‘mêm kơ eng kơ hơkăn kơna kơtĕch năr ou phyou năr anai bơngai klo năm tơ̆ pơsat hơkăn dơ̆ng trĕng lăng tơ̆ păh loel kông Nâm N’jang hăm hơpơi ‘meh vă đei tơƀơ̆p hơkăn hiă mĭnh ‘măng păng hlôi jing hê̆ tơmo tơƀlơ̆k dơ̆ng tŏk bŏk groi ‘ngiĕt glơch glach truh khơ̆ dang ei.