Ƀok Phan Thế Dĩnh oei tơ̆ tơring Ea Tŏh, apŭng Krông Năng sơnăm au đĭ 102 sơnăm păng 79 sơnăm jang Đảng, jĭ bơngai đảng viên sơnăm kră hlŏh kơ Hơnih Đảng dêh char Đak Lăk. Lơ̆m prăt sơnăm jang kĕch mang, mă đơ̆ng oei tơ̆ yơ, iŏk jang tơdrong kiơ, kơchư̆k yă kiơ, ƀok jei hơnơ̆ng oei kơ jăp jơhngơ̆m đon kĕch mang, atŏk kơtang jơhngơ̆m đon tơgoăt tơgoăl lơ̆m khul Đảng adoi nhen lơ̆m tơdrong oei sa yan au. Ƀok oei jing bơngai pơm jŭk yŭk trong hơlau găh jơhngơ̆m đon tơpăt, băt ‘mêm kơ eng dih băl, đei kon pơlei yom kơtang, ‘mêm kơ eng. Truh dang ei, mă đơ̆ng sơnăm đĭ kră, mă lei ƀok Phan Thế Dĩnh oei pran jăng, hơnơ̆ng chă mơ̆ng brŏ vă băt tơdrong kơtơ̆ng ang rim năr. Ƀok hiôk chơt găh tơdrong atŏk tơ iung kơ teh đak hrei au. Hưch hanh hơmanh bơnê hăm dôm bơngai kŏng sản jơhngơ̆m đon ‘lơ̆ng nhen ƀok ling lang vei kơjăp jơhngơ̆m đon lui kiơ̆ hăm Đảng cộng sản Việt Nam, ƀok Phan Thế Dĩnh pơma:“ Tơdrong gĭt kăl hloh kơ khul đảng ‘nŏh ling lang vei kơjăp vă bơngai ‘nŏh đei jing dôm bơngai ‘lơ̆ng pơm jŭk yŭk trong hơlau ăn kon pơlei, ăn rim bơngai kiơ̆ yok rok jơ̆ng. Tơdăh tơdrong ‘lơ̆ng ‘nŏh pă gan kơtang lei ưh kơ jor gô đei ƀơm ưh kơ ‘lơ̆ng truh hăm Đảng. Kơ yuơ lơ loh kơna bơngai đảng viên ling lang hŏk pơhrăm vă đei jing bơngai đảng viên pơm jŭk yŭk trong hơlau, kơna bơngai đảng viên lăng kăl găh tơdrong au”

Hăm tơdrong erih hlŏh mĭnh anglŏ sơnăm păng bơ̆ jang kĕch mang đunh đai tai sơnăm, ƀok Phan Thế Dĩnh tơpă jing bơngai ‘lơ̆ng vă rim đảng viên sơnăm mơlôh kiơ̆ yok rok jơ̆ng, hơnơ̆ng plang jơhngơ̆m ăn pơlei pơla, teh đak. Ƀok Hồ Văn Thái, Bí thư Đảng tơring Ea Tŏh, apŭng Krông năng, dêh char Đăk Lăk tơbăt:“Ƀok Phan Thế Dĩnh ‘nŏh đảng viên ƀôh kang bang kơ̆l tơ̆ tơring au đơ̆ng mă khei ‘năr pơjing tơring hlô. Păng ƀok jĭ bơngai tôch tơnăp bơ̆ jang păng jơhngơ̆m đon Cộng sản kơ ƀok jĭ tôch ‘lơ̆ng hơ iă. ‘Nau jing tơdrong chơt hiôk, hưch hanh hanh bơnê hloh kơ tơring, tơring lăng ‘nau jing bơngai ‘lơ̆ng vă pơtho tơbăt ăn jơhnơr mơlôh hŏk pơhrăm găh jơhngơ̆m đon kĕch mang păng jơhngơ̆m đon bơ̆ jang tơnăp đơ̆ng bơngai đảng viên hăm kon pơlei”.

“Mĭnh jơhngơ̆m đon kiơ̆ Đảng, kiơ̆ Ƀok Hô” ‘nŏh jing tơdrong ‘lơ̆ng đei ƀok  Y Thương K’Măn oei tơ̆ tơring Bông KRang, apŭng Lắk chĕp răk tơƀăk vei. 54 sơnăm mơ̆t jang lơ̆m khul Đảng păng dang ei sơnăm đĭ kră mă lei ƀok oei hơnơ̆ng chă hop akŏm atŭm lơ̆m pơlei, chă pơrô̆ pơrôp kon pơlei rim hơdrung pơm kiơ̆ kơjăp trong bơ̆ jang, khôi luơ̆t Teh đak, đĭ jơhngơ̆m iung jang tơ iung pơjing tơgoăt tơgoăl pôm nơ̆r ƀơ̆r đon hơdrĕch hơdrung. Ƀok Y Thương tơbăt, mă đơ̆ng erih lơ̆m chăl sơnăm rơngei hiôk hian, teh đak roi năr roi pơdrŏng mă lei tơdrong erih sa kơ kon pơlei rim hơdrung kon kông oei đei lơ tơdrong tơnap tap, rim jơhnơr ayăt oei hơnơ̆ng tơchă trong vă pơrăm trong bơ̆ jang đơ̆ng kĕch mang. Kơ yuơ lơ loh, dôm bơngai đảng viên nhen ƀok ‘nŏh jing jrăng tơm, jing hơnih gơnang kơjăp vă kon pơlei kơdih kiơ̆ yok rok jơ̆ng.“Khei năr au ki, Đảng păng Teh đak lăng ba tôch kơjăp hăm tơdrong erih sa kơ kon pơlei kon kông tôch lơ tơdrong, mă kăl ‘nŏh ŭnh hơyuh ŭnh hnam ayơ jei đei, mă ƀar ‘nŏh năm khăm ming hơmet jĭ jăn ư̆h tơhoach kon jên. Dôm tơdrong ‘nŏh jing jơhngơ̆m đon lăng ba kơjăp đơ̆ng Đảng, trong bơ̆ jang đơ̆ng Teh đak hlôi lăng ba kơtang truh kon pơlei kon kông bơ̆n:”

Băt hlôh ƀôh hơdăh găh hơnăp jang đơ̆ng rim bơngai đảng viên nhen ƀok Y Thương Kmăn, ƀok Võ Ngọc Tuyên, Bí thư Đảng apŭng Lăk akhan: ‘Nau jing khul gĭt kăl hloh, jing hơnih gơnang kơjăp ăn kon kông. Rim bơngai đảng viên sơnăm ‘lŏ kră hlôi tơƀôh hơdăh jơhngơ̆m đon nuih mơng, jơhngơ̆m đon ‘lơ̆ng, jing bơngai gĭt kăl hloh lơ̆m tơdrong bơ̆ jang pơrô̆ pơrôp, pơtho tơbăt ăn kon pơlei vang iung jang kiơ̆ trong bơ̆ jang đơ̆ng Đảng, Khôi luơ̆t Teh đak. Ƀok Võ Ngọc Tuyên tơbăt:“Nhôn ling lang sơkơ̆t hơdăh đảng viên ‘nŏh jing mĭnh tŏ pơkao ‘lơ̆ng lơ̆m pơgar pơkao, mă kăl ‘nŏh dôm đảng viên bơ̆ jang đảng đunh sơnăm đe sư jing dôm bơngai pơm jŭk yŭk trong hơlau, bơngai ‘lơ̆ng ăn kơ kon pơlei kiơ̆ yok rok jơ̆ng. Kơ yuơ lơ loh, nhôn lăng ba kơjăp truh tơdrong lăng tông nông gia pơma dơnuh, hơlêm, tơƀơ̆p pơma dơnuh dih băl vă rim đảng viên đei trong jang hơ iă vang tơgop ăn tơring. Tơgăl jing dôm bơngai pơm juk yuk trong hơlau jing dôm bơngai ‘lơ̆ng hơ iă hloh lơ̆m hơnih đảng păng khul đảng tơrting”.

Hơnih Đảng dêh char Đăk Lăk dang ei đei hloh 85.000 ‘nu đảng viên, lơ̆m au đei hloh 5.000 đảng viên bơ̆ jang đảng đơ̆ng 50 sơnăm năm tơ̆ đunh. Dôm đảng viên sơnăm ‘lŏ kră oei hơnơ̆ng plang jơhngơ̆m đon ăn tơdrong bơ̆ jang kĕch mang. Đe sư ‘nŏh jing dôm bơngai yŭk trong hơlau ăn jơhnơr đảng viên mơlôh kiơ̆ yok rok jơ̆ng, jing bơngai ‘lơ̆ng trŏ lăp hăm jơhngơ̆m đon Ƀok Hô hlôi chih “Jơhngơ̆m đon ‘lơ̆ng kĕch mang” kơ dih “Tơmŏng sut hơnơ̆ng hăp roi hơdăh, măih rơ̆ đunh roi mơchêr”./.