Akhan tơ drong jang tŏk 6,5% GDP sơ năm 2023 ‘nŏh tŏ sĕt ƀiơ̆ pơ têng hăm 8,83% lơ̆m 9 khei sơ năm ‘nâu. Mă lei, bơ ngai tang măt Trần Đức Thuận, khul Nghệ An pơ ma hơ dăh: tơ drong jang tŏk sơ năm 2022 ‘nŏh tôch hơ iă mă lei lê̆ gan hơ mĕng tơ drong jang tŏk sơ năm 2023 gô lơ hlŏh dơ̆ng. Kơ lih yoa sơ năm 2023 đei tơ dra gô đei lơ tơ drong krê, ƀât mă tơ drong tơ blăh Nga-Ukraine dang ei tam mă ƀôh vă tôch hrôih, dui hơ tŏk kơ jă unh hơ yuh păng tơ mam xa, pơm ăn kơ jă tơ mam păng jên kon tŏk:

 “Hrei ‘nâu inh tôch tơ rĕk truh tơ drong đak xăng, đak dâu oei jur tŏk ưh sơ đơ̆ng, bơ̆n ưh gơ̆h hŭt đon kơ chăng, ‘nŏh jĭ bơ̆n athei vei lăng tơ drong iŏk yoa đak xăng, đak dâu nhen brei drou ki. Kơ na tơ drong tơ lĕch kơ sô̆ jang tŏk 6,5%, inh kơ chĕng bơ̆n tôch kơ chăng păng tơ lĕch kơ sô̆ jang tŏk 6,5% nhen thoi âu tôch lăp”.

 Bơ ngai tang măt Vũ Tiến Lộc, khul pơlei tơm Hà Nội akhan, tơ drong jang mŭk drăm tĕh đak bơ̆n pơih xă lơ tơ drong, gơ nơm lơ lơ̆m tơ drong tơ mât jên jang, tĕch mơ dro tơ̆ tĕh đak đe, anih tĕch mơ dro lơ̆m apŭng plenh tĕh. Lơ̆m tĕh đak, anih tĕch mơ dro tơ ƀâp lơ mơ mat tat, tơ drong jang tŏk tơm jĭ tĕch mơ dro tơ̆ tĕh đak đe, tơ mât jên jang tơ̆ ‘ngoăih tĕh đak.

“Ƀât oei mơ mat tat thoi nŏh Quốc hội tơ lĕch 1 tơ drong hơ găt jang tŏk 6,5% ‘nŏh jĭ kơ sô̆ kăl đei adrin dêh ‘mơ̆i. Tơ dăh ưh đei tơ drong tơ plih jur tŏk kơ nê̆ hlŏh dơ̆ng lơ̆m apŭng plenh tĕh, 'nŏh bơ̆n gơ̆h jang đei. Oei tơ dăh anih tĕch mơ dro lơ̆m apŭng plenh tĕh đei tơ drong tơ plih, jur tŏk ưh kơ 'lơ̆ng, roi mơ mat tat ƀiơ̆  'nŏh jang tŏk 6,5% 'nŏh kŭm jing tơ drong nol tih”.

Pơ ma truh dôm trong jang tơ̆ hơ năp kơnh, bơ ngai tang măt Vũ Hồng Thanh, khul Quảng Ninh akhan, tơ dăh sek tơ lang ‘lơ̆ng dôm tơ drong tam mă pran dang ei, ‘nŏh tơ drong jang tŏk mŭk drăm, ưh lăp sơ năm ‘nâu đĕch mă sơ năm đơ̆ng rŏng kơnh kŭm iŏk đei ‘lơ̆ng ƀiơ̆:

“Bơ̆n athei sek tơ lang ‘lơ̆ng dôm tơ drong tam mă pran đơ̆ng tơ drong jang mŭk drăm kŭm nhen tơ lĕch jên jang đơ̆ng tĕh đak. Tơ dăh tơ lĕch jên jang ‘lơ̆ng ‘nŏh tơ drong jang tŏk lơ̆m sơ năm 2022 âu rŏ năng lơ hlŏh kơ 8%, thoi nŏh tơ drong tơ lĕch jên jang hiơ̆ lơ̆m sơ năm 2023 athei đei trong sek tơ lang mă ‘lơ̆ng vă tơ lĕch hrĕnh jên jang đơ̆ng tĕh đak. Kŭm hăm ‘nŏh jĭ kơ sô̆ jên 347 rơ bâu ti đơ̆ng tơ drong tơ chơ̆t 43 tơ drong tơ gŭm jên jang vă atŏk tơ iung ming mŭk drăm tơ pôl athei hơ met mă lăp, tơ lĕch mă ‘lơ̆ng hai”.

Lơ̆m giĕng âu ki, mưh pơ ma truh tơ drong jang tơ iung ming mŭk drăm, tơ pôl, dôm bơ ngai tang măt Kuôk hô̆i tơ rĕk truh tơ drong jang “Internet păng kơ măy tĭnh ăn ŏh”. Tơ drong tơm đơ̆ng tơ drong jang âu ‘nŏh ƀơk 1 triu tŏ kơ măy tinh ăn hŏk tro găh dôm unh hnam tơ nuh, mă lei dang ei oei đei 400 rơ bâu kơ măy tinh tam mă đei ƀơk ăn. Găh noh dơ̆ng, tơ drong jang kŭm tam mă pơm ‘lơ̆ng tơ drong chô̆ Internet truh tơ̆ đĭ đăng unh hnam. Dôm bơ ngai tang măt oei tơ blang păng tơ lĕch trong jang tơ̆ hơ năp kơnh. Bơ ngai tang măt Nguyễn Thị Sửu, khul Thừa Thiên Huế athei, tơ̆ hơ năp kơnh akŏm jơ hngâm man anih jang, chô̆ kơ măy kơ mŏk roi tơ băt. Hơ pơi ‘mĕh Kơ dră tơm vei lăng tơ drong tơ roi tơ băt roi tơ ƀôh tơ tom ăn Khul kơ dră kơ dră tĕh đak vă tơ gŭm ăn dôm bơ ngai đei xa yoa đơ̆ng tơ drong jang ‘nâu:

“Tơ plih ăn tơ drong chă ƀơk răh rai ‘nŏh athei jang akŏm tơ̆ xăh dăh mă tơ̆ apŭng, hăm 1 anih vei lăng ‘nŏh đei 1 kơ măy phần mềm atŭm bơ̆ jang tơ̆ jơ̆p tơ ring lơ̆m tĕh đak. Inh ƀôh sư đei yoa ƀiơ̆ păng tơ drong ‘nâu gô tơ gŭm tôch lơ ăn tơ drong jang hăm kơ măy sô̆, jang hăm kơ măy sô̆ tôch gĭt kăl lơ̆m anih pơ tho pơ hrăm, đơ̆ng rŏng kơ 'nŏh jĭ mŭk drăm, jŏh ayŏ kơ dŏ xoang”.

Bơ ngai tang măt Nguyễn Lâm Thành, khul Thái Nguyên akhan: oei pă tŏ sĕt tơ ring, pơ lei pơ la ưh đei hơ yuh internet dăh mă hơ yuh ưh jăng, mă loi ‘noh tơ̆ dôm tơ ring groi kông, tơ ring sơ lam, achon đak dơ sĭ. Kơ plăh ‘nŏh, tơ drong jang hơ yuh internet păng kơmăy tĭnh ăn ŏh, ưh jăh tơ lĕch jang:

“Tơ drong tơm ‘nŏh yoa tơ drong hơ len, chih iŏk tơ̆ yăn âu păng sek tơ lang hrĕnh dôm tơ drong kiơ̆ tơ drong ‘mĕh vă đơ̆ng tơ pôl, kon pơ lei găh hơ yuh internet tam mă jang hrơ̆ch ‘lơ̆ng. Tơ drong jang “Hơ yuh inter net păng kơ măy tinh ăn ŏh” hiơ̆ jang đei ưh thoi ‘mĕh vă. Jô̆ hloi hơ yuh internet păng kơ măy tinh. Tơ drong tơ roi tơ băt lơ̆m tơ drong jang tơm kơ tĕh đak tôch hiơ̆, tam mă đei hla ar pơ tho tơ ƀôh. Tơ drong ‘nâu jing hiơ̆ hyĭn mưh bơ̆ jang tơ̆ yăn âu”.

Tơl nơ̆r apinh tơ̆ hơ năp Kuôk hô̆i, Kơ dră tơm vei lăng tơ drong tơ roi tơ băt Nguyễn Mạnh Hùng akhan: Hrei 'nâu 400 rơ bâu tŏ kơ măy oei pơ yoa ăn tơ drong jang pơ gơ̆r hŏk trư̆k tuyê̆n đơ̆ng rŏng kơ jĭ Covid-19 kơ Anih tơm vei lăng pơ tho pơ hrăm. Đơ̆ng rŏng kơ tơ drong jang 'nâu gô gơih ăn tơ drong jang “Hơ yuh internet păng kơ măy tĭnh ăn ŏh” dơ̆ng.