Tơroi găh tơdrong hơdrin vă gơh đei jang lơ̆m Đảng, đảng viên mơlôh H’Lăic Niê, kơ Chi ƀô̆ Thôn Tân Thịnh, tơring Tân Lập, apŭng Krông Buk ăn tơbăt, đei jăl kơpal, chi ƀô̆ thôn lui ngeh, đoan viên, hơdruh tơdăm pơjao sơnong jang phŏ kơdră Thôn Tân Thịnh, dôm sơnăm kơ âu, pơmai hơnơ̆ng hơdrin jang keh đang ‘lơ̆ng sơnong jang đei pơjao. Mă kăl noh dôm tơdrong jang đoan păng tơdrong jang đe hơdruh tơdăm, đe hơ-ioh tơ̆ thôn. Ăh jê̆ đĭ sơnăm 2022, pơmai H’Lăic Niê chơt hơ-iă đei tơmơ̆t jang Đảng. ‘Nâu jing jơhngơ̆m pran tih tên vă pơmai pơtoi jang tơnăp sơnong jang po, plang jơhngơ̆m pran mơlôh vă pơjing Đảng pran kơtang hloh, pơlei pơla pơdrŏng ‘lơ̆ng hloh: “Đơ̆ng rŏng kơ khei năr hơdrin, inh hlôi đei tơmơ̆t jang Đảng, inh chơt hơ-iă păng sơkơ̆t hơdăh, gô hơdrin hŏk pơhrăm vă jing đảng viên yuk hơlâu, atŭm hăm chi ƀô̆ chă tơroi pơtho pơjing pơlei pơla roi năr roi hơtŏk tơ-iung".

Pơmai H’Lăic Niê jĭ 1 lơ̆m 5 đảng viên mơlôh tơ̆ dôm thôn, pơlei đei Anih jang Đảng tơring Tân Lập, apŭng Krông Buk tơmơ̆t jang Đảng ăh sơnăm 2022. ‘Nâu jĭ minh tơdrong hơdrin tih tên kơ tơring lơ̆m pơtho pơhrăm, hơtŏk đảng viên ‘nao lơ̆m khei năr lơ hơdruh tơdăm tơ̆ dôm thôn, pơlei năm jang tơ̆ ataih, oei bơngai tơ̆ tơring ưh kơ ‘meh mơ̆t jang lơ̆m jơnŭm ơpôl, ưh đei hơdrin pơnam. Mă lei, vă pơhrăm bơngai jang ăn kơ Đảng, Anih juăt jang kơ Đảng tơring Tân Lập, apŭng Krông Buk hlôi akŏm pơgơ̆r chă hơlen, tơmơ̆t jang Đảng vei sơđơ̆ng hơdăh hơdong, ưh đei rơih iŏk bơngai jang đảng ưh kơ trŏ, chă pơm pơtrŏ đĕch ôh. Mă kăl, tơrĕk truh đe đoan viên, bơngai jang đei đon hơdrin, đei sơnong jang tơnăp lơ̆m tơdrong jang tơpôl păng pơkăl tôm jơnŭm jang, tôm chi ƀô̆ athei hơnơ̆ng pơtho pơhrăm vă tơmơ̆t jang đảng. Ƀok Trần Ngọc Sơn, Kơ-iĕng ƀĭ thư Đoan Hơdruh tơdăm tơring Tân Lập ăn tơbăt:“ Găh đoan tơring adoi hơvơn rim đoan viên hơdruh tơdăm hlăng hơdjă, pơtoi rok kiơ̆ đe đoan viên vă tơmơ̆t jang đảng păng đei lơ tơdrong jang vă đe hơdruh tơdăm, đoan viên vang jang dôm tơdrong jang chĭnh trĭ adoi nhen tơdrong jang lơ̆m tơpôl”.

Anih jang Đảng tơring Tân Lập, apŭng Krông Buk adoi sơkơ̆t hơdăh, tơdrong jang hơtŏk đảng viên tơ̆ thôn, pơlei jĭ sơnong jang tơm dơnơm, tơgop hơtŏk tơdrong phăl lơ̆m pơgơ̆r jang, iung tơjră đơ̆ng anih jang đảng. Hloh kơ noh, đe đảng viên oei jĭ gơng tơroh lơ̆m hơtŏk jang mŭk drăm tơpôl, vei sơđơ̆ng tơpôl tơ̆ tơring tơrang. Kơyua noh, hăm dôm tơring kăp gĭt nhen: tơring đei lơ kon pơlei kon kông hơrih jang sa, dôm chi ƀô̆ lơ̆m lơ sơnăm ưh kĕ tơmơ̆t đei đảng viên ‘nao, Anih jang Đảng tơring hlôi chih akŏm pơkăp vă hơtŏk đảng viên, pơjao sơkơ̆t hơdăh ăn dôm chi ƀô̆, dôm jơnŭm tơpôl, lăng âu jĭ minh lơ̆m dôm tơdrong tơchơ̆t kăp gĭt vă sơkơ̆t tơdrong jang rim sơnăm. Atŭm hăm noh, Anih jang Đảng tơring, asong bơngai jang lơ̆m anih jang đảng năm akŏm tơ̆ chi ƀô̆ tơring, đơ̆ng noh băt hơdăh tơdrong đei ƀôh, tơtom pơklaih dôm tơnap tap lơ̆m tơdrong jang hơtŏk đảng viên ‘nao pơma hơdrô̆, adoi nhen hơtŏk Đảng pơma atŭm. Yă Cao Thị Thúy Nga, Ƀĭ thư Anih jang Đảng tơring Tân Lập, apŭng Krông Buk ăn tơbăt:“Đơ̆ng blŭng sơnăm 2023 anih jang đảng hlôi asong tơdrong jang ăn rim bơngai jang lơ̆m khul kơdră chĕp pơgŏr đảng noh pơhrăm hơtŏk đảng viên tơ̆ dôm anih jang đảng ‘noh athei hơlen tơnăp tôm tơdrong đei ƀôh găh hơtŏk mŭk drăm tơpôl lơ̆m tơring păng tơdrong đei yua ăh hơtuch sơnăm kơ dôm thôn gô jing tơdrong tơm vă sơkơ̆t hơdăh hăm kang ƀô̆ jang kơyua tơring pơjao sơnong jang hơlen tơ̆ dôm tơring teh”.

Lơ̆m khei năr truh, Anih jang Đảng tơring Tân Lập, apŭng Krông Buk gô pơtoi hơtŏk pơgơ̆r vă pơm jang đei jơnei hloh dơ̆ng tơdrong hơtŏk Đảng tơ̆ dôm chi ƀô̆ lơ̆m tơring, vei sơđơ̆ng tơdrong pơtoi păng hơtŏk tơ-iung hơnơ̆ng kơ Đảng. Atŭm hăm noh, tơgop hơtŏk tơdrong phăl păng iung tơjră đơ̆ng anih jang Đảng păng đảng viên pơm trŏ tôm sơnong pơjao jang lơ̆m tơdrong pơkăl ‘nao hrei âu.