Tơ̆ jơ tơƀơ̆p tơ̆ apŭng Đơn Dương, bơngai tăh hla apŭng Đơn Dương tơbăt tơdrong chơt hơ iă tơ̆ hơnăp dôm tơdrong iŏk đei jơnei mă teh đak, tơring iok đei lơ̆m khei năr au ki. Mă kăl ‘nŏh lơ̆m bơ̆ jang tang găn sa pơgơ̆m pơjĭp iŏk đei jơnei hơ iă, tơƀôh hơdăh tơdrong bơ̆ jang kơ jăp kơtang đơ̆ng Đảng, khôi luơ̆t Teh đak. Kiơ̆ tơbăt tơ̆ rim ‘măng tơƀơ̆p, lơ̆m 9 khei blŭng sơnăm 2023, bơ̆ jang tang găn sa pơgơ̆m pơjĭp lơ̆m dêh char Lâm Đồng hlôi đei jơnei hơ iă. Pơ đĭ lơ̆m dêh char hlôi iung jang 129 ‘măng dăr lăng hơlen jên hu păng vă jê̆ 1.500 ‘măng dăr lăng tơdrong bơ̆ jang. Hloh dăr lăng hơlen jên hu mŭk drăm, hlôi đei ƀôh pơm glăi hăm kon jên 7 ti 800 triu hlak jên; pơjing tơdrong tơchơ̆t iŏk tơvih, tơchơ̆t sek phak pơm glăi hăm kơsô̆ jên 10 ti hlak jên; athei hơmet pơ ‘lơ̆ng dôm tơdrong jang tim mă ‘lơ̆ng lơ̆m dăr lăng, xek tơlang kơhret rim tơdrong pơm glăi kiơ̆ tơdrong tơchơ̆t. Hloh đơ̆ng dăr lăng, lăng hơlen đei 11 ‘măng tơdrong sa pơgơ̆m pơjiưp đei bôh tŏk bŏk xek tơlang kiơ̆ tơdrong tơchơ̆t; đei 18 tơdrong glăi đei ƀơm truh tơdrong sa pơgơ̆m pơjĭp đơ̆ng sơnăm hơdrol. Bơngai tăh hla athei hơmet ming khôi luơ̆t Groi teh kăl hơdăh hloh dơ̆ng, trŏ lăp hăm yan au tơ̆ tơring vă hơnhăk đei iŏk yua ‘lơ̆ng hơ iă ăn kon pơlei; Găh trong nơnăm, athei atŏk kơtang bơ̆ jang dăr joang vei lăng, lăng ba kơjăp hloh dơ̆ng bơ̆ jang tang găn ‘mi kial hơbŭt hơbông, mă kăl pơyan ‘mi truh.

Tơ̆ jơ tơƀơ̆p, rim ƀok thây kô, sinh viên kơ Hnam trương Đăi hŏk Đà Lạt hlôi pơma tơbăt dôm tơdrong đei ƀơm truh pơtho pơhrăm, kon jên khei, kon jên tơgŭm ƀok thây kô, xek tơlang tơdrong jang ăn sinh viên đơ̆ng rŏng lĕch ‘măng khoă, hla bơar kla ăn rim tơdrong jang chă tơchĕng khoa hŏk ... oei tơƀơ̆p lơ tơnap tap tơhlăk tơhlĭn. Lơ̆m mă noh, tơdrong kăl hloh ‘noh tơdrong sinh viên, dôm bơngai jang hơlen lăng truh tơdrong khoa hŏk tŏk bŏk ưh kơ măh kơtang. Kiơ̆ đơ̆ng ƀok Lê Minh Chiến, Kơdră chĕp pơgơ̆r Hnam trương Đăi hŏk Đà Lạt, ‘măng krao tơmơt sinh viên sơnăm au hnam trương Đăi hŏk Đà Lạt hlôi hơvơn đei 2.800 ‘nu sinh viên mơ̆t hok, lơ̆m au măt bơngai sinh viên, nghiên cứu sinh mơ̆t hŏk rim lăm hŏk đăi hŏk păng đơ̆ng rŏng đăi hŏk găh tơdrong jang khoa hŏk kăl nhen Toán, Lý, Hoá... lăp tŏ sĕt, đei jăl hŏk lăp 2 truh 3 ‘nu chih hơnăn mơ̆t hŏk. Tơdrong tơm kơ yuơ rim trong jang tơgum djru đơ̆ng Teh đak hăm tơdrong au tim mă trŏ lăp, tim mă pơtrŭt bơngai hơgei.“Đảng, Teh đak, Khul kơdră Teh đak păng Kuô̆k hô̆i kăl lăng ba kơjăp hloh dơưng hăm dôm trong jang tơgŭm djru ăn rim ƀok thây kô, bơngai jang chă tơchĕng hơlen păng sinh viên vă đei trong jang nhen hrei au hơnih pơtho pơhrăm sư phạm. Hơnih jang sư pham hrei au ‘ngoăih đei ăn hŏk đĕch ưh kơ ăn jên ‘noh oei tơgŭm jru sinh viên kon jên sŏng sa jei hlôi lơ ƀiơ̆ bơih hăm mĭnh ‘nu kư nhân ‘nao lĕch ‘măng khoă”.

        Đei bơngai tang măt athei kăl pơ̆ih să hơnih mong jên atŏk tơ iung khoa hŏk teh đak, veh ver lon dôm bơngai đei jơhngơm đon jang khoa hŏk, ưh hơvơn păng pơjing đei jơhngơ̆m đon tơchĕng khoa hŏk lơ̆m khul bơngai hŏk jrŭ; lăng hơlen pơđunh sơnăm bơ̆ jang ăn ƀok thây kô pơtho đăi hŏk; lơ̆m au, đei hnam trương Đăi hŏk Đà Lạt. Kơ yuơ yan au ‘meh vă pơđunh khei ‘năr bơ̆ jang kăl đei ƀăng pơtho kơjung, lơ̆m mă vă iŏk đei ƀăng pơtho kơjung lei khei ‘năr bơ̆ jang pă đei tôm, ‘nau đei ƀôh hơdăh lơ̆m tơring Tây Nguyên, tơring Tây Nam Bộ jei tơƀơ̆p tơnap tap. Lơ bơngai tăh hla ‘noh sinh viên apĭnh athei găh tơdrong tơgum djru kon jên ăn tơdrong hŏk sư pham tôch hiơ̆ hyĭn pơtêng hăm tơdrong ‘meh vă yan au; athei găh pơjing rơvơn đei tơdrong jang ăn sinh viên, mă kăl hăm bơngai kon kông hrei au lăp đơ̆ng rŏng lĕch ‘măng khoă đăi hŏk lơ sinh viên tơchă tơdrong jang ưh kơ đei, tơdrong hơrih sa tơnap tap.

Tang măt ăn Khul kơdră tang măt Kuô̆k hô̆i dêh char Lâm Đồng, ƀok Phan Đình Trạc tơgoăt iŏk dôm nơ̆r tơgop đơ̆ng bơngai tăh hla, adoi tơbăt gô pơtruh ăn Kuô̆k hô̆i lơ̆m ‘măng hop akŏm mă 6 truh au kơnh.“Pơm lơ liơ vă rim đe oh hưch hanh hăm tơdrong jang chă tơchĕng khoa hŏk, hưch hanh lơ̆m rim tơdrong jang khoa hŏk păng rim ƀok thây kô pơtho khoa hŏk jei kăl hưch hanh hloh dơ̆ng. Pơm lơ liơ dôm tơdrong hưch hnah hơmanh bơnê jei kăl ‘moi kiơ̆ dôm tơdrong rơvơn sơđơ̆ng găh hơrih sa, tơdăh ưh lei gô ưh kơ đei jơnei. ‘Nau jĭ dôm trong jang kơ teh đak, teh đak kăl iung jang hloi”.

       Kơdră chĕp pơgơ̆r Ban Nội chính Trung ương jei pơkă athei kơdră dêh char Lâm Đồng păng pơlei tơm Đà Lạt kăl akŏm chă mơ̆ng dôm nơ̆r tơgop mă brĕ, mă tơpăt, kăl đei dôm trong chă tơchĕng khoa hŏk mă hơdăh đei ƀơm truh dôm tơdrong teh tơdrŭt hơlih teh, nak, hnam oei, đei ƀơm truh pơprŏ kơ pơlei tơm Đà Lạt khei năr au ki. Tơdrong tơlĕch jang xut xa pơđĭ hnam pơnĭl lơ̆m choh jang sa; trong vei răk hnam sơ̆ ki; bơ̆ jang vei lăng năng tông bri ‘long hơngo, atŏk tơ iung ‘long pơtăm tơ̆ hơyơ̆l bri…jĭ dôm tơdrong đei tơlĕch ăn pơ koĕl pơ đĭ tơpôl vang kơrŭn jơhngơ̆m iung jang mă brĕ ... Jơ ‘năr au, Khul kơdră tang măt Kuô̆k hô̆i dêh char Lâm Đồng hlôi pôk ăn 20 tơnô̆ kon jên hŏk pơhrăm, mĭnh tơnô̆ kơjă 10 triu hlak jên ăn sinh viên Hnam trương Đăi hŏk  Đà Lạt ŭnh hnam tơnap tap mă lei hơdrin hŏk pơhrăm hơgei.