Hăm tơdrong kơchăng tôch kơ brĕ păng hơnăp jang kơtang, tơ̆ ‘Măng hop akŏm mă 6, Kuô̆k hô̆i tơchơ̆t pơđunh dơ̆ng jơ ‘năr pơdrơ̆ng kiơ̆ trong vă pơjing Khôi luơ̆t Groi teh (hơmet ming) vă hơlen hơdăh dôm tơdrong đei ƀơm truh trong bơ̆ jang, sơđơ̆ng rim khôi luơ̆t mưh đei pơjing tơlĕch jang kiơ̆ kăl trŏ lăp hăm tơdrong ‘meh vă kơ tơdrong hơrih sa, mă kăl dôm tơdrong đei hơdrop hăm rim khôi luơ̆t anai. Tơdrong mă au đei lăp mĭnh nơ̆r, tơgŭm djru đơ̆ng Kơdră tang măt Kuô̆k hô̆i. Mă lei, bơngai tang măt Phạm Văn Hòa, khul Đồng Tháp akhan, tơdrong pơđunh jơ ‘năr, tim mă pơdrơ̆ng kiơ̆ Khôi luơ̆t Groi teh gô pơm tơnap tap ăn kon pơlei:" Tim mă pơdrơ̆ng kiơ̆ trong vă pơjing Khôi luơ̆t Groi teh (hơmet ming) kiơ̆ kơ ĭnh ‘nau jĭ kăl tơpă mơ̆n. Mă lei, Khôi luơ̆t Groi teh kăl đei pơdrơ̆ng kiơ̆ lơ̆m khei năr blŭng sơnăm au hloi ưh kơ gơ̆h vă pơm pơđunh dơ̆ng ôh. Tơdăh pơm pơđunh khei ‘năr dang yơ ‘noh tơdrong ưh kơ lăp lơ̆m Khôi luơ̆t Groi teh oei đei tơnap tap, pơm ăn kon pơlei ưh kơ lăp jơhngơ̆m đon. Kơna Khôi luơ̆t Groi teh tim mă pơdrơ̆ng kiơ̆ lei kăl đei mĭnh ‘măng hop akŏm hăt hot lơ̆m blŭng sơnăm 2024”.

Truh vă đĭ khei 12/2023, tơdrong vă pơjing Khôi luơ̆t Groi teh (hơmet ming) hlôi lăng hơlen tôch brĕ hăm 232/265 apăng. Đơ̆ng rŏng lăng hơlen, oei pă 35 apăng, chăl đei rim hơnih bơ̆ jang hlôi drơ̆ng minh nơ̆r hơnơ̆ng hơmet ming, tơmơ̆t dơ̆ng. Hơnih bơ̆ jang Mŭk drăm kơ Kuô̆k hô̆i akhan, tơdăh pơgơ̆r ‘Măng hop akŏm hăt hot Kuô̆k hô̆i lơ̆m khei 1 sơnăm 2024, hăm tơdrong jang lơ, khei ‘năr kơ đeh, tơdrong pơtruh ăn Kuô̆k hô̆i pơdrơ̆ng kiơ̆ lei jĭ tơdrong long kơtang.

Dang ei đei 3 tơdrong hơnơ̆ng tơroi tơbăt ăn Hơnih bơ̆ jang Kuôk hô̆i athei Khul kơdră chĕp pơgơ̆r Teh đak pơm hơdăh hloh dơ̆ng, đei nơ̆r tơgop, trong tơlĕch jang mă hơdăh hloh dơ̆ng ‘noh: găh tơdrong đei iŏk yua groi teh vei lăng sơđơ̆ng teh đak atŭm hăm iung jang hloi choh jang sa, tơ iung pơjing mŭk drăm; găh gơ̆h jang păng kăl jang kiơ̆ đơ̆ng hơnih jang sa kơ Ƀô̆ đô̆i, kŏng ang mưh iŏk yua groi teh vei lăng sơlam teh đak, iung jang hloi lơ̆m choh jang sa, tơ iung pơjing mŭk drăm; găh trong hơlen hơdăh kơjă teh păng dôm tơdrong tơlĕch jang kiơ̆.

Kơdră chĕp pơgơ̆r Kuô̆k hô̆i Vương Đình Huệ hơlen tơdrong vă pơjing Khôi luơ̆t Groi teh (hơmet ming) tôch gĭt kăl. Kơ yuơ lơ loh, tơdrong hơmet ming, tơmơ̆t dơ̆ng trong vă pơjing Khôi luơ̆t au hlôi yak hloh 3 ‘măng hop akom bơih mă lei oei đei lơ tơdrong kăl hơlen mă brĕ hloh dơ̆ng. Kơdră chĕp pơgơ̆r Kuô̆k hô̆i athei lăng hơlen dơ̆ng rim trong vă pơjing khôi luơ̆t. Lơ̆m rim tơdrong kăl, lăp oei pơma dơnuh găh 3 tơdrong tơm păng mĭnh ƀar tơdrong anai. Lơ loh, hlôi đei trong kơnăl vă gơ̆h pơtruh ăn Kuô̆k hô̆i pơdrơ̆ng kiơ̆ tơdrong vă pơjing Khôi luơ̆t Groi teh (hơmet ming) lơ̆m ‘Măng hop akŏm hăt hot ‘măng mă 5: "Ư̆h kơ gơ̆h pơđunh dơ̆ng khei ‘năr pơdrơ̆ng kiơ̆ Khôi luơ̆t Groi teh (hơmet ming) bơih. Kơ yuơ Tơdrong tơchơ̆t 18 pơma hơdăh kăl pơm keh đang Khôi luơ̆t Groi teh lơ̆m sơnăm au. Tơdăh lê̆ lơ̆m ‘Măng hop akom mă 7 lei rŏ khan lăp hơdrô̆ 2 khôi luơ̆t ‘nau nei. Mă ‘Măng hop akom mă 7 tơchĕng lăng gô vă pơdrơ̆ng kiơ̆ 9 khôi luơ̆t. Tơdăh jô̆ pơ đĭ hăm 2 khôi luơ̆t au lei đei jing 11 tơdrong vă pơjing khôi luơ̆t lei oei đei lơ tơdrong dơ̆ng".

 Tơchĕng hơlau, ‘măng hop akom hăt hot ‘măng mă 5 kơ Kuô̆k hô̆i jăl XV gô pơgơ̆r 3 năr, pơgơ̆r blŭng a lơ̆m năr 15/1/2024 kơnh vă lăng hơlen rim tơdrong kăl, tơdrong biĕk vă trong lăp hăm tơdrong ‘meh vă atŏk tơ iung Teh đak, lơ̆m au đei tơdrong vă pơjing Khôi luơ̆t Groi teh (hơmet ming).