Hơdơ̆r dơ̆ng nơ̆r pơma đơ̆ng ƀok Trần Việt Hoà, Kơdră Hơnih bơ̆ jang vei lăng Ŭnh hơyuh găh Hơnih tơm vei lăng Mơdro sa tơ̆ hop akŏm hăm khul chih kơtơ̆ng ang tơroi tơbăt găh tơdrong pơtruh ŭnh hơyuh kơ yuơ Hơnih tơm vei lăng Mơdro sa chĕp pơgơ̆r năr 07/06/2023 - mưh pơm ăn ưh kơ măh ŭnh hơyuh lơ̆m khei năr kăl pơyan phang khei 5, blŭng khei 6 tơring găh Tu pơm ăn truh tơdrong tơpĭt ŭnh hơyuh tơplih dih băl tơ̆ lơ tơring. “Mă đơ̆ng hlôi hơdrin đĭ ai vă sơđơ̆ng ŭnh hơyuh, mă lei tơdrong pơm ăn ưh kơmăh ŭnh hơyuh vă pơtruh ăn atŏk tơ iung mŭk drăm-tơpôl ‘noh hơnăp jang ưh kơ gơ̆h chă pơ ‘nhang tơ̆ au tơ̆ to ôh. Nhôn hlôi pơtruh nơ̆r apĭnh ‘nĕ jô̆ yo hăm đĭ đăng kon pơlei, hơnih mơdro sa, păng mĭnh ‘măng dơ̆ng athei rim bơngai chih kơtơ̆ng ang radiô tivi dôm nơ̆r tơlĕch pơkom ŭnh hơyuh vă kơ bơ̆n vang iung jang, vă đei trong jang kĕ yak hloh dôm khei ‘năr mơmat tat”.

Tơdrong ưh kơ măh ŭnh hơyuh hlôi pơm kơnê̆ kơtang truh tơdrong jang pơm tơlĕch-tĕch mơdro kơ hơnih mơdro sa păng tơdrong hơrih sa kơ bơ̆n. Lơ̆m khei ‘năr ưh kơ măh ŭnh hơyuh tơ̆ tơring găh Tu, hlŏh 4.000 MW ŭnh hơyuh kial tơ̆ tơring Tŏk bŏk, Tây Nguyên păng Nam bộ hlôi ming man keh đang mă lei jei ưh kơ gơ̆h vă tơgoăt tơmơ̆t lơ̆m tơlei ŭnh hơyuh teh đak kơ yuơ đei lơ tơdrong, lơ̆m au tơdrong kăl hlŏh ‘nŏh tơdrong kĕ pơtruh ăn păng ưh kơ tôm dôm tơdrong pơkăp ƀlep kơ rim hơnih jang. Kơtă hloi lơ̆m rim ‘măng “sar bar” au, hơnih bơ̆ jang teh đak pơma hơdăh: gô tơchĕng hơlen, pơjing rim trong jang trŏ lăp vă tơjră hăm dôm tơdrong tơnap tap găh pơtruh ŭnh hơyuh vă pơm dă ƀiơ̆ tơdrong hiong răm ăn kon pơlei păng hơnih mơdro sa.

Lơ nơ̆r pơrô̆ jang ‘moi kiơ̆ rim hla bơar, nơ̆r athei jang kiơ̆ đơ̆ng Khul kơdră chĕp pơgơ̆r Teh đak, Thủ tướng Teh đak truh hloi hơnih tơm, hơnih jang, hơnih mơdro sa-athei lơ̆m rim tơdrong yă kiơ, ‘nĕ lê̆ đei tơdrong ưh kơmăh ŭnh hơyuh-hlôi đei tơlĕch lơ̆m mĭnh poăt khei ‘năr hơtuch sơnăm 2023, mă kăl ‘nŏh Pơprŏ jang ŭnh hơyuh teh đak; Pơprŏ jang atŏk tơ iung ŭnh hơyuh teh đak păng Pơprŏ jang hơnih răk mong, tĕch mơdro đak xăng đak dau, yuh soh teh đak jăl jang 2021-2030, lăng truh sơnăm 2050 hlôi đei Thủ tướng kĭ tơchơ̆t lơ̆m rim khei 5,6,7 au ki. Tơdrong tơlĕch ăn ‘noh pơm lơ liơ vă tơlĕch jang ‘lơ̆ng rim trong jang hlôi đei tơlĕch lơ̆m rim hla bơar Pơprŏ jang au, vă sơđơ̆ng măh mai ŭnh hơyuh? TS Nguyễn Anh Tuấn, găh Jơnŭm jang khoa hŏk Tạp chí Năng lượng Việt Nam sơkơ̆t hơdăh akhan, pơđĭ ƀơ̆t măt păng đunh đai jei kăl pơkom mă blĕ tơklep hăm tơmơ̆t jên jang tơ iung pơjing ŭnh hơyuh ‘nao:“2024-2025 tơdăh phang pơđang hơnơ̆ng nhen lĕ khei 5 khei 6 au ki lei ưh kơ jor tơring găh Tu gô ưh kơmăh dơ̆ng mă lei ưh kơ đei trong ayơ vă hơmet pơ ‘lơ̆ng. Dang ei lăp đei pơkom ŭnh hơyuh, iŏk yua tŏ sĕt đĕch. Khul kơdră Teh đak, rim hơnih tơm, hơnih bơ̆ jang đei ƀơm truh kăl iung jang kơtang dơ̆ng, ‘nĕ chă tơpŭ dih băl, mă kăl rim hơnih tơm ƀơm truh...”.

Hơnơ̆ng hop akŏm lơ̆m teh đak păng apŭng plĕnh teh găh ŭnh hơyuh, lơ̆m au atŏk tơ iung ŭnh hơyuh rơgoh ‘lơ̆ng, đơ̆ng noh iŏk yua pơkom păng jơnei ŭnh hơyuh “tơlĕch jang kơtang” lơ̆m sơnăm 2023. Đei tôch lơ nơ̆r athei tơlĕch ăn, tơklep hăm pơkoel rơgoh ‘lơ̆ng, tơplih ŭnh hơyuh mă trŏ lăp. Bơngai joăt jang mŭk drăm, TS Võ Trí Thành sơkơ̆t hơdăh: găh Kon jên-kon bơngai-kmăi kmŏk păng khôi luơ̆t-trong jang ‘noh dôm tơdrong kăl hlŏh kăl hrôih đei hơmet pơ ‘lơ̆ng vă pơjing đei trong jang kon pơlei tơmơ̆t jên jang ăn atŏk tơ iung ŭnh hơyuh, kơ yuơ mĭnh sơnăm Việt Nam kăl tơmơ̆t dơ̆ng tŏ sĕt hlŏh đơ̆ng 14-16 ti USD vă jang kiơ̆ Trong pơprŏ jang Ŭnh hơyuh 8 kiơ̆ ƀlep pơjing ăn.

Ƀơ̆t măt, vă sơđơ̆ng ŭnh hơyuh sơnăm 2024, Kơdră chĕp pơgơ̆r Hơnih tơm vei lăng Mơdro sa Nguyễn Hồng Diên athei rim hơnih bơ̆ jang ƀơm truh kăl jang ‘lơ̆ng 2 tơdrong jang pơm sơđơ̆ng yuh soh păng pơkom ŭnh hơyuh păng lăng ‘nau jĭ ƀar trong jang kăl hloh pơm sơđơ̆ng ŭnh hơyuh lơ̆m sơnăm 2024:“Kiơ̆ nơ̆r athei jang kiơ̆ 29/TTg đơ̆ng Thủ tướng Teh đak ‘nŏh rim hnam kmăi kăl pơm sơđơ̆ng yuh soh, ngar ăn bơ̆ jang kơ hnam kmăi pơm tơlĕch ŭnh hơyuh. Kăl jang kiơ̆ kơjăp Nơ̆r athei jang kiơ̆  20 đơ̆ng Thủ tướng Teh đak găh tơdrong atŏk kơtang pơkom ŭnh hơyuh ăn jăl jang 2023-2025. Ĭnh akhan trong pơkom ŭnh hơyuh jei jing trong tôch kơ kăl, truh hloi tơ̆ teh đak đe pơdrŏng đe sư jei kăl pơkom. Bơ̆n iŏk yua ŭnh hơyuh oei brăh brư. Kơ yuơ kơjă ŭnh hơyuh re, kơ yuơ nơ̆r pơrô̆ jang kiơ̆ pơkom ŭnh hơyuh kơ bơ̆n tim mă trŏ lăp hăm dôm bơngai iŏk yua ŭnh hơyuh kơna brăh brư oei tôch kơtang. Nơ̆r athei jang kiơ̆ 20 đơ̆ng Thủ tướng Teh đak hlôi pơma hơdăh bơih, bơ̆n kăl jang kiơ̆ mă kơjăp”.