Sang ong Nguyễn Hoàng Dũng ngak hu siam bruk raong lanung oh hu gluh dalam lubang tauk blah nylon. Ong Dũng ngak lubang tauk blah nylon praong meng 20 tal 30m2, glaong meng 1,2 - 1,3m. Dalam lubang hu caik dom phun bạch đàn atah piah ngak labik brei ka lanung daok saong tauk blah nylon tagok gah angaok.

Labik ngak lubang raong lanung brei lahơi, takik hu phun kayau pacang vil val. Mbuan lagaih dalam bruk ba ia tame saong tathuak ia tabiak. Dahlau di tuk ngak lubang, labik taneh nan brei ngak ka nyu samu saong mbleing nao gah tathuak ia. Dahlau di tuk palao lanung tame, urang raong brei ba ia tame jaik bak lubang, blaoh tram meng 5 tal 7 harei meyah blah tauk barau, piah plaih jhak tal prein yava lanung raong.

Ia dalam lubang tuk halei jeng khik di tanut 25cm. Yaok lubang raong lanung, ong Dũng bhian palao 10kg lanung pajaih. Ini lac janih lanung hu cap mek di kraong ribaong, yaok sa kg hu meng 110-120 drei. Pandap mbang ka lanung biak mbuan duah, yau ye: ikan, baoh bao… saok klik.

Hadei di 6 bilan raong, yaok sa kg hu meng 3 tal 5 drei, lac pablei hu saong cap mek pablei. Piah cap mek pablei abih, brei tathuak ia tabiak abih piah cap mek lanung, daok meyah cap mek pablei meneing ye caik lọp atau vah meng pandap mbang. Hadei di tuk cap mek, lanung hu buh tame lubang ia hacih dahlau di tuk pajeng nao. Mbang raong camereip, meng 9 lubang raong, yaok lubang praong 20 tal 30m2, ong mek hu 1,1 tấn lanung saong hu menuac pablei salih blei yaom 130.000 đồng sa kg. Hadei di tuk kaoh tabiak dom phun jien buh tame, sang ong laba hu jaik 60 triệu đồng.

Bruk raong kaya ikan dalam lubang tauk blah nylon urak ini  daok hu pandar rilo di bhum taneran kraong Cửu Long, abih di nyu lac raong ikan padok saong raong lanung. Siam lagaih di bruk raong dalam lubang tauk blah nylon lac phun jien takik, năng suất raong glaong, mbuan tui iek jang dut haong dom bruk raong karei. Bruk raong lanung dalam lubang tauk blah nylon daok tagok khang di tỉnh An Giang haong ban Cần Thơ./.

Urang lang: M.Phương - 19/8/2020  11:46:57