Diuk pasang amuk Hạnh taphia dom baoh kruac bhung hijao bahrau paik

Di bhum taneh ngak padai Thoại Sơn, amuk Lê Thị Hạnh hu thau tal lac sa dalam dom “urang karei peih taneh” palei Ba Thê, daok pasang amuk - ong Nguyễn Quốc Hùng nan lac urang nong naih jioy hu angan ngak tabiak padai pajaih. Jaik abih rai pambuak pagam haong mblang hamu, diuk pasang amuk Hạnh rah tapa abih dom glaih glar cuang kandah di bruk ngak padai.

20 thun dahlau, tuk ong Nguyễn Quốc Hùng buh jien tabiak ngak padai pajaih tapen kraong Vọng Thê 2 (ấp Tân Vọng, xã Vọng Thê), amuk Hạnh jeng ba tangin tame pala yaok rituh gha kruac bhung hijao dalam mblang bein. Tuk ini, sang amuk pambuak bruk ngak van ro piah patagok jien mek tame. Amuk Hạnh khan lac “dahlak ủ khak limo 1 thun blaoh ba buh di gha phun kruac bhung kalik hijao. Ngan haong dom phun kruac bhung kalik hijao daok lavang lavaih, jaik 4 bilan hadei di tuk buh khak limo ye nyu tpraong siam. Manuac sia ndom lac kruac bhung kalik hijao pagam dhar tok mbang hu jaik 10 thun min bein kruac bhung hijao di dahlak labaih 20 thun ini jeng daok brei rilo baoh”.

Mboh hu siam lagaih di khak limo ủ, amuk Hạnh salih ngak iek sa binah mblang taneh padai tapa pala kruac bhung hijao tui jalan hữu cơ, piah ngak tabiak dom janih pandap hacih pablei tabiak darak pasar. Tui nan diuk pasang amuk buh tabiak jaik 6 tỷ đồng piah pah mac kuac taneh hamu pok jeng ro, pasiam taneh meng cur, buh khak lân, pah manuac urang ngak nding pruh ia tự động…

Pasiam veik bein blaoh, amuk Hạnh nao tal Viện phun mbang baoh gah meraong kakei blei 3.000 phun pajaih kruac bhung kalik hijao thau cambaih asal di nyu piah pala angaok 53 công taneh. Bilan hajan thun 2016, dom talei phun kruac bhung hijao akaok meti tamuh tagok di kreh bhum taneh ngak padai Vọng Thê. Diuk pasang amuk Hạnh padang mbang angui meng bruk pala kruac bhung tuk yam tapa umo 60… Amuk Hạnh brei thau, phun kruac bhung kalik hijao tamuh biak siam angaok bhum taneh bahrau. Piah hu baoh hacih, amuk mek pon meng 270 công hamu (27ha) piah ủ, pambuak pagam haong khak limo ủ buh ka phun, taphia di nan pandar jru sinh học piah pacang caga halak halin jit ruak. Amuk Hạnh brei thau: “Meng 1 phun kruac bhung, khaol dahlak buh 1 mbao khak limo saong jaik  40kg pon ủ yaok thun. Khaol dahlak jeng daok ngak iek bruk mbao baoh piah takik njauk halak halin palai kaik”. Urak ini, bein kruac bhung prong  53 công taneh (5,3ha) di baoh sang amuk Hạnh daok tabiak bak baoh.

Tết Nguyên đán meng blaoh, amuk pablei hu 10 tấn baoh. Meng akaok thun 2020 tal ini, amuk Hạnh paik hu jaik 50 tấn. Kayua jit ruak COVID-19, oh pablei tabiak negar langiu hu nan ye amuk brei ka phun tabiak baoh takik, paik yaok mbang sit sit dom tấn piah pablei dalam negar. Meng hu Sở Công thương An Giang pambauk bruk, baoh krauc bhung kalik hijao di trang trại hu pablei dalam siêu thị Tứ Sơn (bal Châu Đốc), dom siêu thị Co.opmart dalam tỉnh An Giang saong Kiên Giang. Langiu di nan, daok hu pablei lẻ ka bhap bani, pablei ka urang ba nao pablei veik.

Gam haong bruk ngak tabiak tui tanut VietGAP, baoh kruac bhung kanduh hijao di sang pala kruac bhung kalik hijao Lê Thị Hạnh bahrau ini daok hu Hội đồng taong yaom, dak angan pandap panda OCOP tỉnh An Giang njauk hatai haong gauk taong yaom lac mek hu tanut OCOP pakat tỉnh. Ini hu mong lac jalan peih tabiak ka dua hadiuk pasang padang mbang angui di umo “U.70” ini, meyaih khan pandap panda tabiak atah jang ./.

Urang lang: Jasi – 23/09