Pabam phun pajaih pagam dhar

Di labik ngak phun pajaih di ong Nguyễn Thanh Sơn (xã Vĩnh Bình, huyện Chợ Lách) urak ini hu jaik pluh urang ngak daok jar var haong bruk pagam dhar phun panat kanjik Thanh Sơn. Ong Sơn khan brei thau: “Janih panat ini hu dahlak palih ruah, pala meng asar pajaih panat kanjik di palei, tuk dahlak mboh phun panat hu baoh prong, pasiu prong saong ba nao pabam pajaih. Hadei di jaik 20 bilan, phun hu meng 2-4 baoh prong, hu pasiu trak labaih 200gr” .  

Tui ong Nguyễn Thanh Sơn, pajaih panat kanjik Thanh Sơn hu jeng angan pablei salih hu rilo menuac thau tal. Yaok thun, labik ngak di ong pablei tabiak darak pasar dalam negar jaik 100.000 phun pajaih, ngak hu hadom ye pablei abih mbong.

Urak ini pajaih panat ini daok hu darak pasar dalam negar saong langiu negar takre. Viện Roh duah phun mbang baoh gah Meraong taong yaom pajaih panat kanjik Thanh Sơn hu pasiu prong, kapal, kanjik katam, yamen bingi, laghaih piah ngak panat bluh thu. Ini lac sa dalam dom pajaih panat dalam negar hu jalan piah cak rok patagok. 

Langiu di bruk ngak pajaih phun panat kanjik, ong Sơn daok hu ngak pajaih bơ lai, phun biar samar hu baoh. Hadei di jaik 15 bilan pala, phun hu baoh prong, ralow kapal, asar sit, tamuh hu di labik pandiak bhang saong njaom mbak. 

Oh lac ta-eng ong Sơn, rilo urang daok di Chợ Lách jeng ngak hu rilo janih phun pajaih lai bahrau pablei ka darak pasar dalam negar. Pagap yau phun aia tasau Mica bahrau hu tut angan độc quyền pandap panda saong pajaih phun đầu dòng; urak ini hu urang nong di Cà Mau, Đắk Nông… pala. Bruk njauk biai di phun aia tasau Mica nan lac yamen, pahe, tuk tasak oh hu katak, mbang hu gam kanduh. Labik ngak phun pajaih di ong Lê Văn Thảo daok pablei tabiak darak pasar panat hatai bhong hala bầu, tuk tasak hu sambo màu cam bhong, pasiu prong, ralow tapal, racam, yamen, pahe. Yak baoh trak jaik 10kg, tui kuhria puac thun 2021 labik di ong meda pablei tabiak darak pasar jaik 300.000 phun pajaih. 

Taphia di nan, bhap bani huyện Chợ Lách daok ngak hu pajaih panat lai hu sambo màu mekre meta saong mbang biak bingi. Panat oh hu katak, pasiu prong, yamen bingi, hu brei angan lac panat cam đào. 

Ong Bùi Thanh Liêm, akaok jabat ngak nong saong patagok huyện Chợ Lách, taong yaom: “Bruk ngak phun pajaih di Chợ Lách jak jeng hu tal 70%. Kadha ini brei mboh, bhap bani ngak phun pajaih di pak ini hu ilamu glaong, brei mboh bruk naih gheih tapa yaok bruk ngak”./.

Urang lang: Jasi -21/07/2021