Lac sa urang daok ranaih, sa-ai Nguyễn Ngọc Điền daok di bal Phan Thiết ba drei tame bruk ngak nong công nghệ glaong meng bruk pala dâu tây tui ilamu công nghệ Aquaponics angaok mblang taneh 500 m² di xã Hàm Chính, huyện Hàm Thuận Bắc hu jaik 1 thun ini mai. Sa-ai Điền brei thau: Meng hatai takre ngak nong tui jalan bahrau, piah meng nan ngak tabiak dom pandap panda hu năng suất, chất lượng saong paglaong kein laba bruk ngak mbang pala drak nan ye hadei di tuk bac blaoh gah công nghệ sinh học di bal raya Hồ Chí Minh sa-ai kham merat duah thau dom bruk ngak nong công nghệ glaong. Tui nan, meng akaok thun 2020, sa-ai buh jien tame pala dâu tây công nghệ glaong ini.

Nao rivang bein, takik thei saneng lac langik pandiak yau Bình Thuận bo pala hu saong baoh dâu pahe bingi yau ini. Kayua lac meng kan mai, ndom tal dâu tây ye manuac sia saneng chip tal bhum taneh Đà Lạt. Tacei brei khaol dahlak iek dom phun dâu daok tabiak rilo bingu saong ndam baoh, sa-ai Điền brei thau, piah hu yau harei ini, sa-ai hu oh takik mbang khat lahik min meng hatai kham merat ngak ka bahu, tal harei ini sa-ai mek hu jak jeng. Sa-ai Điền daok khan lac: “Urak ini di Bình Thuận, dahlak lac urang akaok mereip pala dâu tây saong ngak tui công nghệ Aquaponics. Ini lac bruk pambuak gauk di raong pala kaya ikan dalam aia saong pala phun dalam aia. Nan lac, raong ikan saong pala dâu tây dalam sa labik tuần hoàn, vi khuẩn hu kein nyu ngak brei ia nerak meng danao raong ikan jeng chất dinh dưỡng hữu cơ lagaih ka phun pala, hadei di nan, aia hu halang hacih saong pabak veik ka danao raong ikan.”

Ini lac jalan ngak tabiak hữu cơ bahrau, pambuak pagam haong gauk, ngak jeng labik siam laghaih, daong ngak tabiak pandap panda kaya mbang hacih sa-at. Urak ini, sa-ai Điền hu tut angan pala dâu tây tui VietGap piah hu brei harak ba pandap panda tame darak pasar pablei ka urang blei pandar takre pandap panda kaya mbang hacih sa-at./.

Urang lang: Thụy Sĩ  10/3/2021