Langik pandiak thuurang nong kan kandah pala padai 

Bhum taneran krong CL dok  dalam bilan pandiak bhang, njom mbak khang. Yau nan min di tỉnh Bạc Liêu, rilo urang nong ngak padai Đông xuân oh suh sah hagait ka bruk kurang ia taba pabak ka bruk pala drak .Ong Trần Hoàng Hận daok di xã Vĩnh Hưng, huyện Vĩnh Lợi brei thau : Dalam tuk urang nong di rilo labik glaih glar duah ia taba pabak ka phun padai ye urang nong pak ni oh duh hatai hagait meng hu bruk pruh padai  pasah thu pablah gauk. Kayua jalan ngak ni patak pataom hu ia song rilo pok jien karei, min dong ka phun padai tamuh siam, hu năng suất glong dut song bruk ngak padai yau meng kan mai  

“mehit lac pandiak bhang njom mbak min pak ni oh njauk hagait. Năng suất  dahlau  daih labaih  5 tấn, 5 tấn labaih  angaok  1 ha. Dok urak ni labaih  7-8 tấn /ha, hu urang ngak  labaih sa  tấn/ sa công”.

Ong Nguyễn Hoàng Hương- Akaok  Hội đồng quản trị Hợp tác xã Nam Hưng di  huyện Vĩnh Lợi, tỉnh Bạc Liêu brei thau: meng bruk dong di  gah ngak nong tỉnh, atah di ni  7 thun Hợp tác xã di ong peih bruk pruh padai  pasah  thu pablah gauk camereip dalam tỉnh Bạc Liêu angaok mblang taneh prong jiak 60ha. meng nan bo yaok thun dom xã viên pak ni  mek hu kein laba glong dalam bilan padai Đông xuân yaom lac pandiak bhang, njom mbak rah tabiak khang. Meng jalan ngak ni, sa bilan padai hu cakak ia  meng 3- 4 mbang  song tuk Njuk ia tame mblang hamu ye ia tok hu meng 5 cm, oh lac  meng 10 tal 20 cm yau dahlau daih. Meng nan, dong ka urang nong trun hu meng 20 - 30% ia pruh bo oh njauk hagait tal năng suất. Langiu di nan, tukvak mblang hamu thu, nan lac tuk phun padai hu 30 - 40 harei hadei di tuk tam drak meda lagaih ka gha padai mbang dalam tame taneh song Njuk mek chất dinh dưỡng.Phun padai hu gha kajap, phun khang ye takik hu halak song takik jaoh jaleih. Bruk ngak ni daok hu dong ka urang nong abih takik padai pajaih, khak drak song trun meng 2 - 4 mbang pruh jru halak halin, khik caga môi trường puk palei.

“ Dahlau deih ngak tui jalan meng kan ye tuk halei angaok mblang hamu jeng hu ia, Drak kapan, buh khak rilo ba tal halak halin, jaoh jaleih. Peih bruk pruh pasah  thu  pablak gauk ye khak jru dut song dahlau deih nyu takik jang biak rilo, ia pruh angaok mblang jeng takik jang biak rilo dut song dahlau deih ”.

Dahlau deih, urang nong abih jien ngak padai meng 22- 23 triệu đồng/sa ha, meng tuk pandar jalan pruh padai pasah thu pablah gauk ye phun jien nyu trun dok labaih 17 triệu đồng/sa ha; năng suất padai mek hu biak glong, kayua yau nan ye laba hu rilo jang labaih 5 triệu đồng/sa ha. Meyah thau pandar siam  ilamu pruh  pasah thu pablah gauk song danak dak “1 njauk - 5 trun”, “3 trun - 3 tagok”…ye urang nong hu laba jang tal 7 triệu đồng/sa ha. Ong Lê Văn Hải daok di xã Vĩnh Hưng, huyện Vĩnh Lợi brei thau:Dahlau di tuk yam tame bilan thu, urang nong pak ni ba gauk pasiam veik, patagok bilai jhuk ia, ar pacang, kuac raok krong ribong khik ia taba piah tuk tame  bilan ngak  pandar jalan pruh pasah thu pablah gauk ka nyu njauk.

“ Dahlau deih kayua oh ka bac megru nan ye oh thau pruh pablah pasah thu hagait. Urak ni  hu bilai jhuk ia, hu mblang hamu pruh pablah thu pasah lagaih jang, siam jang dahlau deih biak rilo kein laba glong jang dahlau deih.”

Bruk pruh pasah thu pablah gauk dok hu pambak prong di dom bhum taneh bhian njauk pandiak bhang, ia njom mbak dalam tỉnh Bạc Liêu. Tui yaok pataom, bilan padai  Đông xuân thun ni,hu labaih 15 ribau  ha hu urang nong pandar jalan ngak ni,  meblah labaih  30% tong abih mblang taneh tam drak dalam tỉnh. Urak ni hu rilo mblang taneh padai  mek hu  meng 7,7 tấn tagok angaok sa ha./

Urang lang: Hanipha -8/4