Ikan dầm xanh lac janih ikan mbang hu rilo janih, mbuan raong

Sang saai Bùi Văn Chính, daok di xã Nhân Mỹ, huyện Tân Lạc, tỉnh Hoà Bình lac sa baoh sang hu angan ka bruk raong ikan dầm xanh. Danao ikan di saai Chính hu yaok ribau drei, trak meng 800 gr tal labaih 1kg sa drei.

Saai Bùi Văn Chính khan lac: sang saai hu 2 danao, 1 danao di anak sang, daok sa danao di gah angaok suối Cái. Piah ka ikan quý praong siam, sa-ai ngak nding ba ia meng suối Cái mai. Ia suối Cái jangaih, nduac luac thun, laar bingi lac lagaih ka janih ikan quý caih mebaoh. Ia nduac tame, tabiak gam gam nan ye danao raong ikan di sang saai biak jangaih, laar luac thun. Meng nan, ikan ndiuk siam yau daok dalam kraong, ribaong caih, mebaoh siam.

Tui saai Chính, ikan dầm xanh lac janih ikan mbang hu rilo janih, mbuan raong, min janih ikan ni oh mbang haliek công nghiệp yau dom janih ikan karei. Pandap mbang di ikan dầm xanh rilo meng lac hariek, hala bei plaom, hala patei, gha padai... hu dalam langik tasik. Piah ikan dầm xanh praong samar, saai bhian brei ka ikan mbang pabak dom janih pandap mbang hu rilo tapung yau ye tangei, halek brah… Yaok harei, ikan dầm xanh mbang 3 var: page, jala pandiak saong melam. Ia dalam danao raong tuk halei jeng brei khik hacih sa-at, ikan brei hu tui iek gam gam gah teik trak saong dom janih ruak tamuh tabiak.

Dut saong dom janih ikan karei, ikan dầm xanh hu prein pacang caga ruak siam, oh metai tuk langik tasik oh siam. Min piah mek pajaih hu ikan ni, bhap bini daok di huyện Tân Lạc bhian raong ikan amaik di 1 danao karei. Hadei di tuk ikan amaik mebaoh saong ikan anek praong ginup, ikan anek hu sraong tabiak raong di danao karei.

Ong Bùi Hồng Phong, baoh sang raong ikan di puk Trăng Tà, xã Nhân Mỹ daok brei thau lac, tuk ba tabiak raong taeng ikan dầm xanh meng mebaoh hu. Dut saong dom janih ikan karei, ikan dầm xanh praong suai jang, raong 5 thun meng trak hu meng 2 - 3 kg. Min ralaow ikan pahe bingi jang dom janih ikan karei raong di pak ni.

Sang ong Phong, saai Chính, lac 2 dalam 3 baoh sang daok di xã Nhân Mỹ hu ikan dầm xanh caih mebaoh dalam danao raong. Meng di tuk ikan caih mebaoh, hu yaok ribau drei ikan pajaih hu pablei tabiak darak pasa, yaom 20.000 đồng/ sa drei. Ngan haong ikan dầm xanh pablei tabiak darak pasa, yaom 250.000 đồng/kg. Yaok thun, jien mek tame di dom baoh sang raong ikan meng 70-80 triệu đồng sa thun hadei di tuk kaoh abih jien buh tabiak raong. Ong Bùi Văn Thắng, Bí thư Đảng ủy xã Nhân Mỹ brei thau: "Ni jeng lac bruk ngak rik tame bruk khik ramik ikan quý; peih tabiak jalan cak rok patagok kinh tế hu rilo kein laba, daong ka bhap bini di pak ni paglaong jien mek tame”./.

Urang lang: Thu Thảo – 17/03