Bruk rong hadang dalam danao di urang nong hu kein lagaih 

Puac thun 2018, sang saai Đặng Phước Hoàng, xã Điền Lộc, huyện Phong Điền ngak iek bruk rong hadang  thẻ takai patih meng danao vin gul. Yaok danao prong  500m2, meon bạt angaok khung pasei gul, caik angaok mbaok haluk cuah, phun jien pandap padang ngak samu 1/3 dut song danao vuông. Taneh danao rong sit nan ye mbuan khik iek, mbuan langyah dom bruk pambuak tal ia. Tuk vak rong, dom janih yau hadang metai, pandap mbang labaih, khak hadang … mbuan si pataom veik ala mbat danao, lagaih ka bruk pataom mek song langyah njauk ilamu kỹ thuật. Meng nan, ala mbat khik hu hacih saat luac bilan rong, takik hu vi khuẩn song khí độc pataom veik dalam danao.

Gam haong nan,  piah hadang praong siam, sang saai Hoàng  pandar ilamu raong hadang  thẻ tui 3 tuk vak meng pabam pajaih tal raong praong. Pajaih hadang thẻ takai patih  hadei di labaih 20 harei raong song tui iek, langyah dom anek ruak, khik kajap siam mekre meng palao trun danao rong tuk vak ka 2 meng  15-20 harei, hadei di nan, salih tapa tuk vak ka 3 rong hadang pablei.

Saai Đặng Phước Hoàng khan lac, danao vin gul oh abih rilo menuac tui iek, takik tuk vak sục khí… nan ye abih takik jien buh tame, mbuan khik iek alam môi trường, jit ruak, iek glang hadang; tagok hu rilo mbang rong dalam thun duk song danao vuông song takik nerak alam môi trường. Kuhria rah tapa, yaok thun  sang saai mek pablei 4 mbang, hu meng 80-100 tấn sa thun, duah hu meng 12-15 tỷ đồng, laba hu labaih  3 tỷ đồng sa thun

Mboh hu dom siam lagaih di bruk rong hadang dalam danao vin gul di sang saai Hoàng, dom sang di xã Điền Lộc, huyện Phong Điền ba gauk pambuak bruk padang ngak tui công nghệ ni. Ong Hoàng Văn Nhung hong ong Hoàng Thanh Hùng brei buh tabiak labaih 2 tỷ đồng salih tapa rong hadang danao vin gul song palao rong 36 ribau hadang pajaih. Ong Hoàng Văn Nhung brei thau: "Piah rong hadang dalam danao vin gul hu kein laba glong, kol dahlak buh jien ngak labik rong sre. Urang rong dahlau di tuk tame danao brei juak ủng, nao tapa danao ia jru tím song pruh jru tame tangin meng cồn 70 độ piah trun bruk njom jit ruak. Abih di nyu nan lac ngak njauk ilamu langyah ia tame tapa danao halang, danao langyah, danao caga, puac di abih tal danao rong. Brei palih ruah drei pajaih saat ruak, raong dalam danao meng  20 - 30 harei ka nyu praong nde gauk jeng palao tabiak danao rong. Dalam tuk rong, chất thải rắn meng danao brei hu halang ka saat, bhian pataom mek .

Ni lac sa dalam dom jalan ngak prong ba mai jak jeng suai lavik ka bruk ngak ni. Muk  Phan Thị Thu Hồng, Phaok akaok Chi cục kaya ikan Thừa Thiên - Huế tong yaom: Ni hu mong lac bruk rong hadang  meng  công nghệ bahrau song rilo siam lagaih, salamat, khang kajap, ba mai kein laba  kinh tế glong./.

Urang lang: Hanipha- 3/11