Raong sò huyết kein laba biak rilo

Sang ong Mai Văn Thọ daok di ấp Kinh Lớn, xã Đông Thới, huyện Cái Nước, tỉnh Cà Mau peih bruk raong sò huyết dalam danao hadang meng thun 2017. Meng taneh raong 0,7 ha, meng thun camriep ngak, sang ong mek tame hu jaik 200 triệu đồng meng bruk raong ni. Dom thun hadei nan, laba tagok labaih 100 triệu đồng/ sa thun, daong ka ong padang hu baoh sang praong, gheih makre.

Ong Thọ brei thau, yaok hecta, ong palao meng 250 – 300 ribau drei sò pajaih, taong abih jien buh tame labaih 30 triệu đồng. Hadei di 8 bilan ngak, jien laba mek hu rilo jang 4 mbang jien phun. Thun ni, sang ong palao labaih 20 triệu đồng jien pajaih, hadei di 5 bilan, sò daok praong siam saong yau mboh di anak meta bruk jak jeng, siam mare: “Hu gam hadang, rieng min biak takik, daok sò ba mai kein laba rilo jang, daong ka  raidiuk di sang dalak hu tani tanat. Raong sò mbuan jang raong rieng, anek rieng njauk brei mbang, daok sò ye oh cang brei mbang bo ba mai kein laba biak glaong. Raong sò tok salih ia gam gam piah mek phù sa tame ngak pandap mbang”.

  Dahlau nan, di Kapul pambuak bruk raong rieng 2/9 di xã Đông Thới, huyện Cái Nước, tỉnh Cà Mau, mikva rilo meng raong rieng saong hadang sú. Meng thun 2014 tal urak ni, rilo urang dalam kapul palao pablak sò tame danao raong saong mek hu kein laba glaong. Ong Nguyễn Minh Phồi, akaok Kapul pambuak bruk raong rieng 2/9 brei thau, anek sò ba jien tame labaih 100 triệu đồng/ha/ sa thun saong jeng janih raong praong dalam bruk raong pablah gam hadang – rieng–sò. Sa dalam dom bruk piah khik ka bruk raong sò hu jak jeng lac tuk palao pajaih, danao hadang oh brei hu rong, độ mbak brei hu mangaok 20 phần ngàn: “Urak ni 80% dom baoh sang raong sò. Taong abih jien mek tame dalam 1 thun hu gam hadang saong rieng ye labaih 170 triệu đồng/ha. Raong sò ye oh hu hagaih lac kan kandah, dahlau abih lac njauk thau pilih ruah pajaih siam, ka dua lac maong taneh hu lagaih ha oh, hu rong ha oh. Taneh bo oh siam ye raong oh hu”.

Siam lagaih di bruk raong sò huyết dalam danao raong hadang lac mbuan ngak saong takik prien iek glang. Taeng di xã Đông Thới, labik camriep peih ngak bruk ini di huyện Cái Nước, urak ni hu rilo sang raong abih tih labaih 500 hecta. Meng jien laba 100 triệu đồng/ha/sa thun, bruk raong ni daok hu daong ka rilo baoh sang husalih bahrau. Ong Võ Văn Triệu, Phó akaok UB bhap bini xã Đông Phước brei thau: “Nan lac bruk bahrau. Dom thun dahlau, dalam bhap bini urang bangsa, hu dom sang kan kathaot duah hu sò ba mai palao raong. Hadei di nan, pakat angaok trun pato pasram ilamu piah ka mikva ngak hu siam mekre jang. Sản lượng mek hu biak glaong, taneh praong atau sit jeng raong hu abih. Nan lac bruk daong ka bhap bini puk palei cak rok patagok kinh tế, trun sang kan kathaot di xã”.

Bruk raong pablak sò huyết dalam danao hadang daok brei mboh hu kein laba. Vaktu tapa, bruk ngak ini cak rok khang dalam huyện Cái Nước, tỉnh Cà Mau. Abih di nyu nan lac yaom sò saong labik pablei daok hu tani tanat hadei di rilo thun nan ye daok hu rilo tinh, ban pilih ruah raong ngak iek, pambak praong./.

Urang lang: Thu Thảo - 29/07