Rilo mblang tamekai dok tabiak boh rilo pabak ka drak pasa 

Sang ong Lâm Văn Quyền (daok di palei Tân Điền B, xã Thanh Tùng, huyện Đầm Dơi) rilo thun ni mai pala tamekai pablei Tết angaok taneh prong labaih 1.000 m2 taneh dok di tapen sang. Thun ni, langik lagaih nan ye sang ong pala njauk. Ong kuhria mboh lac, hadei di tuk alin brei gauk gar, Tết ni tamekai laba hu 10 triệu đồng.

Ong Quyền brei thau, dahlau deih, sang ong tok pala njam patam baoh kraoh angaok taneh sit taom dar sang piah mbang yaok harei. Kayua njom mbak glaong nan ye njam patam oh siam. Min, hadei di dom mbang pala, ia mbak nyu taba meneing nan ye pala hu siam tagok. Abih di nyu nan lac, sang ong hu bac bruk pa-auk khak meng kanduh song akaok hadang piah pasiam veik taneh nan ye kein lagaih dak harei dak glong. Tui nan, oh daok bruk klaak nao kanduh hadang saong akaok hadang u mek pruac bloh, ye mik va ba nao paauk jeng khak piah buh ka njam patam. Janih khak ni jeng lac jalan ilamu piah ka sang ong  Lâm Văn Quyền pala hu 6 vụ tamekai  pablei Tết, jeng hu siam lagaih:

"Cei pandar khak  NPK song khk hadang piah pasiam veik. Meyah drei pala takik meng 50 – 70 talei tamekai  ye buh tame labaih 1kg khak hadang, bloh tram 2-3 harei. Meyah drei paauk khak  meng thun dahlau, thun ni mek pandar ye dak siam. Khak nan srau hong ia  bloh pruh, oh tuh tapak tame gha".  .

Tui bhap bini pak ni, ilamu pasiam veik taneh  piah pala hu dom janih  njam patam oh kan. Bilan hajan oh pok ro min bilan pandiak brei pok ro glong meng 2 tấc tal meteh mét. Njauk buh cur pasiam taneh dahlau di harei pala labaih sa adit. Bruk pala dok veik yau pala njam patam di bhum taneh ia taba. Min, kan kandah prong abih ngan song mik va pak ni jeng lac jalan ia pruh dalam bilan thu. Lac pala njam patam di angaok mbaok taneh ia njom mbak nan ye mik va brei hu ia pruh rilo jang. Kayua di pak ni tok hu ia dalam haluk, nan ye yaok sang tok pala hu meng 1 – 2 công taneh, oh peih prong taneh pala hu.

Sang ong Nguyễn Văn Hóa (jeng daok dalam xã Thanh Tùng) jeng hu ilamu 3 thun pala njam di mblang song dom danao jiak sang. Meng taneh prong labaih  1.500 m2, sang ong duah hu jaik 40 triệu đồng/sa thun. Bhian di nyu, sang ong pala tangei atau dom janih njam patam. Min tuk jiak  Tết, ong jang yau rilo boh sang karei di pak ni salih tapa pala tamekai piah pablei ka darak pasa Tết. Ong Nguyễn Văn Hóa brei thau:

:Cei mboh taneh klaak saoh, nyu tamuh hareik biak damen nan ye cei buh jien tabiak ngak. Pala ye mek pren ngak laba. Taneh ni cei oh klaak saoh, sa thun pala 2 vụ tangei, 2 vụ tamekai".

Ong Nguyễn Phương Bình, Phó Chủ tịch UBND huyện Đầm Dơi brei thau, dalam huyện hu labaih 500 ha taneh pala njam patam baoh kraoh. Yaom lac taneh di pak ni njom mbak luac thun, min, meyah thau pasiam taneh ye bruk pala njam patam ba mai kein laba glong . Ilamu pasiam veik taneh njom mbak oh biak kan, tuk vak tapa, gah chức năng pak ni hu peih prong bruk pathau khan piah ka mik va pala drak hu siam lagaih jang. Dom pakat karja pak ni tuk halei jeng pachreih bhap bini patagok bruk pala njam patam, baoh kraoh piah mbang saong piah pablei mek jien. Abih di nyu nan lac, tuk puac thun hu dong ka mik va duah hu jien rilo jang meng bilan pala pablei Tết./.

Urang lang: Hanipha- 24/2