Tuk dom hamu tal pakat bhum ceik cuk tame rup ban sambo kanyik bilan padai tathak, mikva urang bangsa H’Mong daok di xa Púng Luông, tinh Lao Cai tame Ngak adat mbang uan akaok padai bahrau - adat bhap bini ndung bak ilamo bangsa, gam hu makna duh yang, gam lac bruk dui pachreih tuai damuai mai rivang iek.

Adat Mbang uan akaok padai bahrau thun ini gam hu peih ngak di xa Púng Luông di puac bilan 9 lac piah brei ka bhap bini gam haong gauk khik ramik, patagok dom ilamo siam gheih; gam haong yaih khan ilamo gheih karei di urang bangsa H’Mong nao tal rilo tuai damuai urang jirah dalam saong langiu negar.

Meng dom rai dahlau mai, raidiuk di urang bangsa H’Mong pagam haong apuh pakak, padai hamu tal pakat saong bilan pala drak di angaok mbuan ceik glaong. Tuk bilan padai kanyik di mbuan ceik, dom asar brah akaok bilan pahe bangi abih hu palih ruah ngak lisei bahrau. Dahlau tuk mbang dom lissei meng prein ngak di drei, yaok baoh sang jeng ngak adat pok lisei tagok yang mukkei, brei mboh hatai thau ka langik ceik glai, halau ia saong likau ka baoh sang khang kadang, palei pala salamat, ngak hasa mek hu dua klau tagok.

Adat Mbang uan akaok padai bahrau oh sa janih brei hu angan makna ka bruk duh yang blaoh daok brei mboh adat menyum ia hadar tal halau ia, hatai thau dhar phol ong amuk mei, ong kei saong bruk iek praong ngan haong prein ngak bruk tapa dom rairah.

Dalam adat uan Mbang akaok padai bahrau, po sang gam da-a ong amuk mei, saong dom urang lahik mbaok dalam but pajaih ba jiwa mai maong iek hatai thau ndua dhar phol; patui di nan lac dom yang mebang hu urang bangsa H’Mong iek praong yau yang baoh sang, yang apui, yang kraong, yang ceik… Tapa adat, urang bangsa H’Mong payua caong takre di drei ka dom bilan ngak mbang lagaih, raidiuk ginup bak, baoh sang haniem phol saong palei pala salamat; gam haong nan lac bingun piah dom urang dalam baoh sang, but pajaih saong bhap bini hu kak pambuak gauk ralo jang.

Meyah binah harei raya adat cambat yang mabang ndung bak bruk praong prang, iek praong ye binah taya gilac rah tabiak chreih chrai, bui sambai haong rilo danak dak yau kacah thaok baoh ahar tapei kapan, caoh menuk, adaoh tamia… dui pachreih rilo tuai rahra saong tuai damuai hu mbaok ba drei tame.

Sa-ai kamei angan Nguyễn Thu Hà, tuai damuai mai meng tinh Quang Ninh brei thau: “Harei ini dahlak hulin mai tal xa Púng Luông saong hu maong iek mikva kacah thaok ahar baoh tapei kapan bánh dày, tapak mbang kaya ahar ini. Dahlak mboh biak bangi saong chreih mekre.”

Patagok pok praong pok glaong drap ar nan, langiu di bruk ngak adat di yaok baoh sang, dom thun jaik di ini, Adat Mbang uan akaok padai bahrau daok hu peih ngak praong di labik bhap bini piah tuai damuai jirah mbuan hu mbaok tame saong jirah rivang.

Klah rabha ka makna di bruk ini, amuk Hờ Thị Dê, Phaok Akaok UB Bhap bini xa Púng Luông brei thau, bruk peih ngak Adat Mbang uan akaok padai bahrau pagam haong bruk ilamo bhap bini oh tok daong khik ramik, patagok drap ar ilamo oh mboh di meta pakat negar blaoh daok lac talei pambuak hu makna piah yaih khan thaik thaot palei pala, anek menuac Púng Luông nao tal ayut cuai atah jaik; tapa nan pamedeih hatai mboh hadah mbaok meta dalam rai rah sit umo saong brei prein patagok jirah rivang karo kajap.

Ini oh sa janih lac bruk lagaih piah khik ramik, pato vei ilamo bangsa, blaoh daok daong brei kein lagaih dom kaya jirah rivang hu angan, ba thaik thaot Púng Luông – bhum taneh di bilan kanyik, ilamo saong anek menuac bhum glaong nao tal jaik jang haong tuai damuai urang jirah di dalam saong langiu negar.

Ngan haong dom yaom kaom siam gheih ka ilamo saong adat cambat, thun 2021, Adat uan akaok padai bahrau di bangsa H’Mong daok di bhum glaong Mù Cang Chải dahlau diah hu Mentri Ilamo, Pahat padhih saong Jirah rivang tut tangin brei angan tame Harak Drap ar ilamo oh mboh di meta pakat Negar./.