Di ban sit Tịnh Biên (klak), bruk ngak saradang thotnot jeng sa bruk meng kal klak, ba mai jien mek tame tani tanat ka urang bangsa Khmer. Rah tui jalan Tinh lo 955 ba tame pasak phuong An Phú, tuai damuai mbuan mboh rilo labik parang pablei saradang thot not – ndap nda angan je kayua mikva Khmer ngak tabiak.

Palei Sóc Tà Ngáo, phuong An Phú (klak) ieu lac sa labik hu rilo baoh sang rahra jeng daok khik tani tanat bruk ngak saradang thot not meng kal. Yaok thun, meng bilan 11 saka ia bilan thun ini tal bilan 5 saka ia bilan thun hadei, tuk bilan hajan abih, salih tapa bilan thu, mikva gilac jal val srap gap ndap nda piah tame bilan tanek saradang bahrau.

Baoh sang di ong Châu Nhen hu klau rai rah tui bruk tanek saradang thot not. Ong Châu Nhen brei thau: “Dahlak hulin pagam saong bruk ini labaih 25 thun paje. Urak ini, baoh sang dahlak hulin hu 10 phun thot not saong pah veik 6 phun di urang taphia. Yaok harei, khaol dahlak hulin paik dua mbang, hu labaih 30 lit ia meng bangu thot not, taneh tabiak labaih 6kilo saradang, pablei haong yaom 50.000 dong/kg. Bruk ini biak rambah, brei kajal ndik tagok glaong saong nao meng hadah masup page ka meng mek hu rilo ia thot not. Bruk ngak saradang oh kan, min bei ka bruk tari taring, kayua meyah khin hu saradang bangi, patih kaok ye brei katuk apui taoh gam gam. Saradang thot not hu pablei rilo di dom labik yulit, hu tuai damuai takre blei mai sang ngak ndap nda kaya alin hadiah. Meng bruk ngak saradang, baoh sang dahlak hulin hu jien mek tame labaih 8 trieu dong yaok bilan, tal piah pandar dalam raidiuk”.

Piah mek hu “janih ia” yamen bangi, pataom meng pandiak angin bhum Bảy Núi, rahra brei pandar gai kandip ngak meng kreim piah kandip tame bangu thot not dom harei dahlau tuk mek ia. Yaok rituh thun tapa, urang Khmer di ini thau pandar dom yaom kaom meng phun thot not, pandar bangu piah mek ia ngak saradang.

Urak ini, karja palei hu peih ngak rilo jalan langyah khik ramik bruk ngak meng kal ini. Tukvak tapa, huyen Tri Tôn (klak) hu peih rilo danak dak ilamo piah yaih khan ndap nda meng thot not, gam saong nan patagaok bruk jirah rivang. Tuai damuai meda rivang iek tapak bruk tanek saradang, mbang menyum thot not that tapak saong blei dom ndap nda ba mai sang ngak ndap nda alin. Tapa di nan, gam khik ramik, gam patagok bruk ngak meng kal dahlau mai, gam ngak jeng ndap nda kaya saradang thot not di urang bangsa Khmer, daong ka ndap nda kaya saradang hu angan je di An Giang dak harei dak brei mboh yaom kaom dalam raidiuk bhap bini./.