Bangsa Lự diuk rai rilo di xa Khun Há tinh Lai Châu, tapa rilo tukvak gam saong bruk patagok di rahra, bangsa Lự di ini jeng daok khik piah hu rilo ilamo bangsa gheih ghang, dalam nan njauk ndom tal hu lac adat nyaom juk tagei.

Thei mai tal xa Khun Há jeng mboh takre saong cambuai klao gheh ghang, anit ranam tuai di dom amuk, dom mik anai biak mbuan hadar tuk hu tagei juk. Dalam kadha saong dom urang kamei bangsa di ini, khol dahlak hulin hu thau, adat nyaom tagei mai meng bruk sahneng ka bruk gheih ghang di urang bangsa Lự nan lac urang kamei halei nyaom tagei juk meng hu rilo urang likei caik hatai, tagei juk ka meng lac tagei gheih. Dom urang likei bangsa Lự tal umo nao rah duah kamei mek ngak diuk jeng tok chreih tok khin dom urang kamei hu tagei juk, kayua tui hatai sahaneng lac dom urang kamei juk tagei nan ka meng lac sa urang diuk tari taring, thau ka pasang thau ka anek. Kayua yau nan, dom thun jaik di ini urang kamei bangsa Lự umo meng 13, 14 thun jeng nyaom juk tagei.

Pandap piah nyaom tagei juk biak mbuan si duah dalam nan hu: phun ngứa, ging apui. Dalam yaok baoh sang bangsa Lự, urang kamei jeng srap gap ka drei ndap nda njauk hu, hu dahlau piah nyaom tagei. Yaok malam, hadei tuk mbang huak blaoh, taphia ging apui, dom urang kumei nan ba phun ngứa tabiak cuh piah katak phun nduac tabiak, blaoh mek asak juk pagam di phun ngứa braoh tagei piah nyaom tagei jeng sambo bar juk, ngak nao ngak mai rilo mbang dalam 30 minit tal 1 tuk.

Malam yaok malam, hadei di tuk huak mbang blaoh, amuk Lò Thị Xeng di palei Thắm daok taphia ging apui nyaom tagei, sa mbeng nyaom lahik bih jaik 1 mon. Amuk nyaom tagei meng bahrau umo 13 thun, tui amuk nyaom tagei juk gam ngak gheih ka urang kamei gam pacang caga halak mbang tagei.

Jeng yau amuk Xeng, amuk Lò Thị Khằm daok di palei Nà Khum nyaom tagei tuk daok dara, umo 14 thun amuk nyaom tagei juk blaoh paje, tak ini jeng nyaom tagei yaok harei, huak blaoh lac tame ging nyaom tagei, nyaom blaoh ka meng nao ndih, kayua tui amuk lac tagei juk ka meng gheih, klao tagok mboh gheih ghang jang.

Gam saong mikva urang bangsa Lự, adat nyaom tagei juk urak ini tok daok khik di dom anai meng umo 45 thun ba tagok. Kayua yau nan ye, pakat uy, karja xa tuk halei jeng sangka, jhul khang bruk pathau khan, jak ba piah rahra patui khik ramik saong patagok ilamo gheih ghang di bangsa Lự piah adat nyaom juk tagei oh kurang lahik, gam saong di nan jhul tagok bruk jirah rivang di bhum palei.

Bruk khik ramik adat nyaom juk tagei oh lac sa janih khik ramik sa adat meng kal blaoh daok khik sa bruk gheih ghang karei di urang bangsa Lào labik bhum ceik Tay Bac, nyu jeng ieu lac brei mboh bruk gheih ghang siam mekre ka bruk hu rilo ilamo bhap bini dom bangsa takik di Viet Nam./.