Bruk pak la-a, kreim bhap bini di urang Thai di tinh Dien Bien hu meng kal mai; hu ngak jeng, patagok tapa bruk ngak mbang daok dang di rilo rai rah menuac urang, hu khik veik, patui bruk saong patagok dalam bhap bini bangsa Thai. Meng akaok camreip, mikva tok pak dom kaya hu thaik thaot mbuan si pak piah duh ka bruk daok dang dalam baoh sang. Rah tapa lauac jalan hadah krah, urang Thai ndak tabiak dom kaya pak hu jalan ngak kan jang, rilo thaik thaot saong pandar ka rilo bruk karei gauk yau ye: Kaya pandar dalam bruk daok dang yaok harei, bruk duh yang mebang, bruk ngak mbang pala drak…

Labaih 50 thun pagam haong bruk pak la-a, kreim di xa Tà Nấu, ong Quàng Văn Phích brei thau, dahlau diah, dom ndap nda rilo meng lac duh ka raidiuk yaok harei. Dom thun jaik ini, tuk rahra takre pandar dom kaya siam ka alam, dom kaya la-a, kreim hu pak meng tangin hu labik dang bahrau. Rilo kapul pambuak bruk, labik ngak tabiak ndap nda hu pdang tabiak, pambuak haong gah ngak mbang pablei salih ba ndap nda tabiak darak pasar.

Tui ong Phích, khin ngak tabiak hu dom ndap nda kajap saong gheih, urang ngak brei hu ilamo duah la-a, kreim. Dom phun kreim di langiu maong biak kablok, sambo bar oh takre meta min nan lac dom phun kreim taha, lagaih piah pak. Ngan haong phun la-a, phun song ye tok mek talei taha, thro tagok phun glaong, hu sambo bar kanyik atau hijao piah khik kajap bruk laman lamuac. Gam haong nan, dom phun la-a, kreim brei tapak samu gauk saong atah ye meng brei tabiak gan tapak blaoh tuk pak oh hu pambuak di rilo.

Di xa Na Sang, bruk pak la-a, kreim hu khik tani tanat saong patagok. Dalam xa urak ini hu yaok pluh baoh sang tui bruk, pataom di dom palei yau ye: Co Đứa, Na Sang 1, Na Sang 2. Amuk Lò Thị Đon (palei Co Đứa) brei thau: “Lac ndap nda ngak meng tangin hu tuai damuai takre kayua gheih, kajap, siam ka alam langik. Yaok ndap nda ngak tabiak jeng hu rahra, gah ngak mbang pablei salih mai tal labik pataom blei. Meng pataom blei gam gam, hu bilan dahlak pablei hu yaok pluh kaya. Rilo baoh sang dalam palei jeng tui bruk, gam hu bruk ngak tuk lahei gam hu jien mek tame”.

Meng tani tanat akaok pablei tabiak, tal ini, rilo baoh sang jeng khik tabni tanat bruk saong hu jien mek tame karei. Kuhria rah tapa yaok bilan, dom baoh sang ngak bruk meda hu pataom mai meng yaok rituh ribau tal yaok trieu dong, patui dom kaya saong janih kaya.

Ngan haong dom yaom kaom ilamo, kinh te – xa hoi bo bruk pak la-a, kreim ba mai, Mentri Ilamo, Pahat padhih saong Jirah rivang hu brei angan “Bruk pak la-a, kreim di bangsa Thai di tinh Dien Bien” tame Harak angan drap ar ilamo oh mboh di meta pakat negar. Ini oh lac bruk hadah mbaok meta di urtrang bangsa Thai, bo daok brei mboh bruk siam gheih di bruk bhap bini ndung bak ilamo bangsa.

Tui So Ilamo, Pahat Padhih saong Jirah rivang tinh Dien Bien, tukvak anak tal, labik pataom padang co che, sarak, paglaong siam lagaih bruk pasang iek, pathau khan, daong haong gah ngak mbang pablei salih saong rahra dalam dom asal kadha hu pambuak tal bruk khik ramik, patagok rilo ndap nda jirah rivang… Meng nan, daong paglaong asar siam raidiuk ka rahra jeng yau kein lagaih piah thau jang ka ilamo, drap ar, pandar siam jang haong dom salih ka bruk daok dang mbang ngui piah meda hu pandar siam lagaih, ngak njauk dom yaom kaom drap ar kaya siam glaong.

So Ilamo, Pahat padhih saong Jirah rivang lac talei pambuak jhul khang dom danak dak yaih khan, khau tin pathau khan, pato megru, paglaong ilamo di dom pakat, dom gah saong rahra, gah ngak mbang pablei salih ka bruk ngak, bruk hu makna, dom kein lagaih bo drap ar ba mai, ngak drap ar jeng kaya meda./.