Dalam dom adat hu angan di bangsa urang Khmer, dom thong hala padang hala paneng, padang sala thor, urang Khmer ieu lac Rông saong Thon Rông lac janih kaya ngui oh kurang hu dalam raidiuk.

Di xa Thuận Hòa, ban Can Tho, sang ong Lý Được rah tapa dua rai rah pagam haong bruk ngak thong hala paneng bhap bini. Tuk daok sit, ong bhian daok iek ame di drei ngak dom janih thong hala ba pablei, ngak miat blaoh mboh takre. Tal tuk praong tagok, ong tui ame ngak bruk saong khik bruk tal harei ini. Ong Lý Được ndom meyai lac:

“Dahlak hulin bac bruk ngak meng ame dahlak hulin tui jalan amaik ame pato ka anek, urak ini hu jamraik daong nan ngak samar jang dut haong dahlau rilo, meng kal taong abih hu ngak meng tangin meng bruk cagaik kayau, thah kayau,…urak ini hu jamraik ngak abih nan ngak biak samar”

Sang ong Được tui bruk ngak hu mbiah tal harei ini lac mai meng hatai di diuk gait. Diuk ong angan Triệu Thị Vui, sa urang cih thaik kareih danei angan di xa Phú Tân, huyen Châu Thành, tinh Sóc Trăng (klak). Dom tukvak lahei oh cih thaik, amuk daok daong ong ngak bingula ka dom thong hala paneng bahrau ngak blaoh. Dom bingula blaoh amuk bac hu jeng lac mai meng amaik ame pato. Anai Triệu Thị Vui brei thau:

“Dahlak hulin bac bruk meng baoh sang pasang kayua ame di pasang ngak bruk kayau, meng akaok meti ngak tabiak jeng kan pablei nan ngak takik, hadei pablei hu nan ngak dak harei dak rilo jang.”

Bruk ngak thong hala oh daok hu ngak rilo yau meng kal, min darak pasar blei kaya ini jeng daok. Yaom lac bruk ngak oh bhian, jien mek tame oh rilo, min bruk ini jeng daok tal piah ka ong amuk pandar ka baoh sang. Jeng kayua takre bruk ini nan ong amuk oh iek praong ka yaom kaom, rilo meng lac hu urang kakei blei saong ngak tabiak kaya gheih lac ong amuk bui rilo paje.

Meng bruk ba abih tung tian haong bruk ngak, hatai ka bruk ngak lac bruk kham merat, tani tanat ka yaok ndap nda, yaok bilan baoh sang tuk halei jeng taduan hu panuac kakei blei meng rilo labik, dalam saong langiu tinh.

Meda ndom lac, sang ong Lý Được hu ngak saong daok rik daong siam gheih ka bruk khik ramik bruk ngak thong hala di urang bangsa Khmer, tuk bo bruk ngak bhap bini ini dang anak bruk kurang lahik. Dom ndap nda kaya ngui ngak tabiak oh lac hu yaom kaom ka kinh te bo daok padang dalam nan hatai glo akaok ka diuk rai, pambak tabiak ilamo bangsa ka rai rah harei hadei./.