Ong Lê Thành Hùng, Akaok UB Bhap bini xa Đông Cuông brei thau, Adat Lisei bahrau Kalan Đông Cuông rah tabiak dalam puac bilan 10 tui saka ia harei, min thun ini kayua kanjah jhak di ribuk ka 10 ngak kan ia dauk trak di Labik Inem mek Kalan Muk Maik Palei Mẫu Đông Cuông, nan xa tok peih banah adat. Dom banah adat hu ngak tani tanat, praong prang, brei mboh hatai thau khik ramik, pok meyaom saong patagok yaom kaom ilamo bhap bini di dom bangsa labik ini.

Ndih dalam dom adat bhap bini, adat paling di adit ieu lac adat praong, pok praong pok glaong po amaik Mẫu Thượng Ngàn saong dom Po Yang ka bruk hu srap gap ginup ndap nda kaya, likau hu pok paling thau dhar phol hadei sa thun bilan mek hu rilo, kaya pok ka paling yang tui Adat.

Dom thun jaik ini, Kalan Đông Cuông ieu lac labik paling yang di rilo rahra saong tuai damuai rilo labik dalam luac jalan jirah rivang paling yang mebang, thau hadar tal mekkei. Yaok thun hu tal yaok rituh ribau mbang tuai damuai meng grauk tinh, ban dalam negar mai kalam Mẫu Đệ Nhị Thượng Ngàn cuh gilau nyang pok tagok Mẫu saong langkar likau ka taneh ia, rahra hu sron mbon salamat, likau jien padai, likau siam mekre dalam raidiuk.

Sa-ai Cao Văn Tuấn tuai damuai mai meng Ha Noi brei thau, sa-ai mboh adat paling dalam adit biak karei, brei labik raya adat ginreih, ndung bak sambo bar bhum taneh glai ceik glaong. Ini lac tukwak piah sa-ai payua caong takre brei ka sa thun bahrau di baoh sang hu siam mekre, raidiuk dak harei dak tagok kaya meda siampurna.

Saai Hoàng Thị Thu Hiền, tuai jirah meng Phú Thọ brei thau, yaok thun, mbiah tal harei ngak yang mbang akaok lasei barau brei ka kalan Đông Cuông, saai hu ramik masa mai yolyang. Tui saai inilac yolyang lakau brei ka prein yawa khang kadang kajap karo po pajeng selamat ka drei jeng ye ka sang danaok gauk ralo di drei. Yaoak mbang mai patom mbaok di harei raya saai chrei ralo di abih hu yang sik kabau juk saong hoak mbang lasei barau.

Gam saong bruk pok je saong khik ramik dom ilamo siam gheih, Adat ngak yang mbang akaok Lisei bahrau di Kalan Đông Cuông pamedeih ilamo thau phol thau dhar, hatai gul pataom bhap bini, hatai pacang khik dom yaom kaom drap ar ilamo oh mboh di meta ndung bak ilamo bangsa, bruk hadah mbaok meta bangsa dalam dom tal rahra; paglaong hatai gul pataom, kham merat saong padang palei pala, taneh ia dak harei dak ginup kaya meda.

Kalan Đông Cuông ieu lac sa baoh kalan lawik klak taphia kraong Hồng daok dalam palei Bến Đền, xa Đông Cuông, huyen Vân Yên klak, meng kal mai hu danei angan lac labik ginreih. Kalan duh paling Muk amaik Mẫu Đệ Nhị thượng Ngàn – Mẫu ka dua dalam Tam Tòa Thánh Mẫu, jeng lac labik duh paling dom urang hu prein ka bangsa hu buh prein dalam mbang taong mesuh khamang Nguyen Mong di abap XVIII gam haong dom urang pan akaok lac urang bangsa Tày halan tian klak rup drei dalam mbang dang tagok taong patiaok khamang Prang di thun nesak Rimaong 1914.

Rah tapa dom bruk tagok trun di dalam sajarah, Kalan hu brei pasiam, hu ngak 4 mbang. Thun 2009, Kalan hu mbaoh tangin brei angan lac Inem mek sajarah – ilamo pakat negar; harei 16/1/2023, Adat Kalan Đông Cuông hu tut angan tame harak angan drap ar oh mboh di meta hlai haong adat duh paling Mẫu di urang Viet ngan haong ilamo gheih karei di mikva urang bangsa Tày Khao./.