Labaih sa bilan ini mai, yaom amriak kalu gam gam tagok veik

Urak ini yaom amriak kalu daok hu urang pablei salih blei di bein dalam huyện Châu Đức, tỉnh Bà Rịa-Vũng Tàu yaom meng 78.000-79.000 đồng/kg. Dut haong puac bilan 2, yaom amriak kalu tagok jaik 30.000 đồng sa kg saong glaong jang jaik dua mbang dut haong tukvak ini thun dahlau.

Sang ong Trương Đức Hồng, ấp Lộc Hòa, xã Bình Giã, huyện Châu Đức daok paik amriak kalu tuk yaom amriak kalu daok tagok yaok harei. 3 harei ini, langiu di dua diuk pasang ong daok hu 6 urang ngak pah daok kham merat paik amriak kalu. Ong Hồng brei thau, bein amraik kalu 1ha di sang ong daok di thun ka 5, yaom lac hu mong iek tani tanat min thun ini tok hu jaik 3 tấn, trun 1 meteh dut haong thun dahlau. Yaom lac sản lượng biar, min pabak veik, yaom amriak kalu dak harei dak tagok ngak ka ong biak bui sambai. Tui yaom pablei yau ini, tui kuhria ong laba hu jaik 120 triệu đồng.

Di huyện Xuyên Mộc, sa adit mai ini, urang blei salih daok ba gauk mai tal bein biak rilo. Yaom blei di bein urak ini meng 77.000-79.000 đồng sa kg janih amriak kalu pala tui jalan hữu cơ, yaom amriak kalu bhian hu dom đại lý, urang duah blei ba-yar glaong jang meng 10-15%. Tui sahneng mboh di dom urang pala amriak kalu dalam tỉnh Bà Rịa-Vũng Tàu,  yaom amriak kalu meda daok tagok jang dalam tukvak anak tal, dom urang pala amriak kalu caong khin hu jien ye pablei chip dalam tukvak ini, min jeng hu biak rilo urang daok khik  veik piah cang yaom tagok glaong meng pablei.

Ong Đỗ Chí Khởi, Akaok Jabat ngak nong saong patagok palei pala huyện Châu Đức, tỉnh Bà Rịa-Vũng Tàu brei thau, yaom amriak kalu tagok veik lac kadha bui sambai, abih di nyu nan lac dalam huyện Châu Đức, tuk phun amriak kalu jeng daok lac phun pala rilo di huyện, ngan haong mblang taneh pala urak ini jaik 5.900ha.

Yau nan min, ong Khởi jeng hu panuac kakei mikva njauk caik hatai tuk pala veik phun amriak kalu di urak ini, kayua lac urak ini yaom kaom oh ka tani tanat, nyu daok tagok biak pandiak, dalam tuk nan sản lượng trun khang, bruk duah urang paik amriak kalu jeng biak kan kandah tuk jien pah urang piak dak harei dak glaong. Bruk anak meta nan lac mikva njauk pataom tame mong iek, buh jien tame mblang taneh amriak kalu daok brei năng suất tani tanat, umo phun oh ka glaong, plaih bruk pala bahrau angaok mblang taneh thu lagu.

Daok ong Nguyễn Chí Đức, akaok Chi cục pala drak saong khik caga phun pala tỉnh Bà Rịa-Vũng Tàu ndom lac, yaom amaraik kalu tagok nan lac jalan pachreih urang pala amriak kalu hadei di rilo thun yaom laik trun biar. Min, ong Đức jeng ndom lac, tui yaom yau urak ini, mikva paka amaraik kalu tok mek hu jien phun, oh ka hu laba rilo. Kayua lac rilo thun tapa yaom amriak kalu tuk halei jeng daok di tanut biar, rilo bein amaraik kalu dalam tỉnh rilo thun oh hu mong iek tal nan ye ba tal sản lượng biar. Dalam tuk nan, yaom pah urang ngak, jien blei khak, blei jru dak harei dak tagok glaong ba tal phun jien buh tame biak glaong.

Darak pasar amraik kalu oh ka tani tanat, kayua yau nan ye, gah ngak nong  tỉnh Bà Rịa-Vũng Tàu hu panuac kakei lac tukvak urak ini, mikva urang nong njauk sahneng kuhria tani tanat tuk khin pala gilac amriak kalu, plaih buh jien tame ngak rilo, salih tapa jalan buh jien tame ngak biar, pataom tame sa labik, sangka mong iek, pasiam veik dom mblang taneh pala amriak kalu daok hu baoh takik, piah cak rok patagok khang kajap, plaih khat lahik./.

Urang lang: Jasi – 24/03