Yaok bilan padeih bilan pandiak, hatai caong duah danak dak ilamo diuk rai, ba drei tame bruk bol lin ka uranaih gilac tagok rilo. Pambak tame bruk ini, dom kol bleik blah padang dom fanpage, group saong website ja lau. Tui nan, oh kan piah duah mboh angaok mang xa hoi don fanpage hu angan “Trai he bol lin 2025”, “Tukvak bac ngak kong an”, “Bac ngak bol lin”, “Trai he chinh quy”… hu rah tabiak rilo di dom bilan he.

 Dom labik ini bhian pandar dom thaik thaot, video meng dom danak dak asal tapak hu peih ngak, pagam logo di dom labik bol lin, kong an piah mek hu hatai je. Bruk njauk duh hatai lac oh takik amaik ame, kayua oh hu tukvak pasang iek tani tanat nan mbuan ngak palaik angan jie di drei.

Hadei di tuk pan hu hatai “caong khin ka anek hu pasram, ba drei tame labik bac pasram”, dom kol bleik blah drah taom gaok dom urang meng dom panuac da-a yau ye: “Brei bac saoh meyah tut angan drah”, “Pagun sanya brei harak mbaoh tangin di Mentri Caga Nagar Quoc Phong”, “Anek saih hu daong khan ao, mbang daok, pasram ilamo diuk rai “… Tuk amaik ame caik gilac khau tin, kol nan payua tama tut angan, pandar bayar jien pasang iek atau “ngak bruk” piah hu bayar gilac jien saong jien laba meng gah daong jien.

Tuk akaok meti, paok jien sit hu bayar gilac samar drah ngak ka urang je hatai tame. Hadei dom mbang, khol nan pandar bayar paok jien praong jang, gaok mai tagok tal yaok pluh, yaok rituh trieu dong ngan haong makna lac “ngak cambaih laih tin nhiem” atau “loi he thong”.

Njauk ndom tal jang, dom kol bleik bhian mek angan lac “pambuak haong labik bol lin”, “pambuak haong pasak Pato pakai ilamo jat asal chinh quy”, gaok mai pandar dom kadha vak cakak pagam meng harak asal piah mek hu hatai je. Tuk urang thau ka njauk pagat, fanpage salih angan paje, graop tayah klak paje, dom tai khoan cakak abih jalan pambuak.

Tui dom jabat chuc nang, dom bruk brei mboh dom labik pachot pagat dalam nan hu: Fanpage salih angan rilo mbang, oh caik cambaih laih lek taka phone, labik daok; thaik thaot cakak pagam meng danak dak biak; daom bruk pambuak tok tapa jalan harak kakei dalam jamraik, oh hu ngak tantu tui jalan hukum pandar.

Dom jabat karja jeng duah mboh dom bruk bahrau daok hu peih ngak. Cambaih laih lac, meng akaok thun 2025, dom kol bleik blah hu salih tapa bruk “passang iek tin nhiem” salih ka “ngak bruk ngak online” yau dahlau. Nyu taong tame hâti sahneng “caong ka anek hu njauk pilih ruah”, ba tabiak pandar ngak pasang iek samar drah, mbuan, pagam tui panuac paguen sanya bayar jien gok saong brei mayaom jien meng gah daong jien. Tuk camreip, paok jien pasang iek biar, hu bayar njauk tukvak piah mek hatai je. Min tok hadei dom mbang, dom paok jien bayar tagok samar drah saong amaik ame laik tame bruk “khin mek gilac jien ye brei bayar jien ngak tantu cambaih laih tui sarak hukum”.

Jabat karja pachreih, amaik ame oh bayar jien meyah oh ka oh mboh tantu hu labik dang ngak; brei caik dahlau bruk tut angan tapak di dom jabat, kapul yau Kapul Dam dara, Bo Chi huy Halau janeng pan akaok bol lin, Kong an bhum palei… tuk mboh bruk pachot pagat, brei pathau khan ka kong an. Langiu di nan, urang ilamo an ninh mang jeng kakei caga, urak ini, rilo fanpage pandar AI piah padang thaik thaot, video, taong yaom ndom meyai ja ngak ka urang kan si thau halei biak halei oh.

Mentri Kong an jeng pachreih rahra brei caik hatai caga, njauk bayar jien tuk biar halei thau cambaih laih angan saong bruk hukum di labik dang ngak, oh pang tui tacei ba tapa online tin nhan, oh biak yau ye tapa panuac kakei di Zalo, Telegram, Messenger…/.