
Bahrau balaoh di fanpage Mentri Polih Kong an hu brei thau mbang pathau khan lahik 400 trieu dong hadei di gat bayar jien 16.000 ndong jien ship.
Tuk camreip, bruk nyu rah tabiak dalam kreh adit bilan 4/2025. Tui di nan, sa-ai T. (huyen Thạch Hà, Ha Tinh) mek hu mbang taong phone khan brei thau ka sa ndap nda “0 dong”, bayar tok 16.000 dong jien pajeng jao. Kayua rilo mbang blei ndap nda tapa online nan sa-ai T. oh caga hagait saong ngak tui bruk bayar jien pajeng jao ini.
Truh hu labaih 30 minit hadei di tuk bayar 16.000 ndong jien jao ndap nda, sa-ai T. patui veik mek hu mbang taong phone pagam tui brei thau lac sa-ai payua suan tame tai khoan “thanh vien” di kongti jao ndap nda, saong meng bilan hadei njauk lahik 4,5 trieu dong. Duh hatai, sa-ai T. hu pato tacei cuak yut Facebook haong tai khoan ja hu angan “GHTK daong” piah ngak harak yah klak tut angan.
Patui di nan, dom kol bleik payua jalan link pandar sa-ai T. pabak khau tin khan tai khoan gilang pariak, angan jie mat khau saong ma xac thuc. Je tame ngak tui, tok dalam hasit minit, sa-ai T. mboh tai khoan di drei lahik abih 49 trieu dong.
Mboh tatuak drei, sa-ai T. patui veik pambuak ka kol nan ye hu tacei ba ngak mbuah kan piah mek gilac jien. Sa-ai T. hu ba tame kapul chat “mek gilac jien GHTK”. Di kapul ini, dom urang ngak ja lau brei mboh ka bruk mek gilac hu jien. Sa-ai T. je tame jang.
Hadei di nan, rilo dom paok jien “mbuah kan”, “jien xác minh”… gam gam hu sa-ai T. payua nao. Tal tuk sa-ai T. thau ka drei njauk pagat ye lahik labaih 150 trieu dong.
Oh padeih di nan, kapul kol bleik ngak ja angan sa tai khoan karei taong videocall tapa Messenger, ndom mayai khan lac drei lac sa urang jakar di Kuk Polih Canh sat Hinh su saong khan brei thau “Kol dahlak hulin daok pasang duah thau sa jalan talei pachot pagat tapa negar. Sa-ai lac njauk urang gat. Min luai oh ngak kan kandah tal bruk pasang duah thau, sa-ai oh brei ka thei thau bruk ini, oh khan haong thei yaom lac urang dalam sang urang krein”.
Dalam tuk mblung mabuk, pang mboh yau nan, sa-ai T. khan gilac abih tih kadha haong “urang jakar Kong an" caong takre mek hu gilac dom paok jien lahik. Urang ngak ja lau kong an patui veik pandar sa-ai T. pabak abih tih khau tin di drei, lek taka so tai khoan gilang pariak, ngak tantu cambaih laih saong pandar sa-ai ini brei thau angan meng bruk puac ma OTP payua tame phone. Abih tih jien lahik di sa-ai T. hadei mbang pachot pagat tagok tal 400 trieu ndong. Ini lac paok jien patak pataom di baoh sang sa-ai luac dom thun.
Urak ni, bruk ini daok hu jabat karja pasang duah thau tui adat hukum, tapa di ini, jabat polih kong an pakakei:
- Tantu oh pabak khau tin tai khoan gilang pariak, ma OTP ka thei tapa phone, harak phone, atau mang xa hoi.
- Tantu oh tame dom jalan link drei oh thau, abih di nyu nan lac dom link pandar tame tai khoan gilang pariak, payua jien, atau pabak khau tin di drei.
- Caga haong dom mbang taong phone ngak ja lau urang jao ndap nda, jabat karja. Mayah oh tantu njauk brei taong phone tapak tal taong ndai atau nao tal jabat kong an jaik abih piah khan brei thau tantu.
- Oh je tame dom kapul chat, kapul “daong mek gilac jien “ - ini lac bruk hadah krah piah pachot pagat patui veik.
- Kajap hatai anak dom khau tin mek hu, abih di nyu nan lac khau tin ngak ka drei mblung mabuk suh sah duh hatai./.
Viết bình luận