Ralaoh taka radaih lac bruk piah thau hu makna piah daong ka kapul pasang iek saong pakaro jalan hu siam lagaih. Tuk urang peih nduac radaih pacang atau oh patapak ralaoh taka lek radaih, kamera pasang iek oh meda thau njauk radaih suan hukum, ngak kan kandah ka bruk duah thau saong langyah bruk ngak suan hukum. Bruk ini ngak patakik siam lagaih di bruk taong bhat tapa kamera, ngak ka dom urang sua hukum jalan mbak oh hu langyah samu dil.

Dom urang hu bruk pacang ralaoh lek taka radaih bhian hu sahneng ka bruk ngak suan hukum jalan mbak yau nduac tapa gom bhong merah jalan, nduac tapa tanut brei nduac samar, nao suan jalan atau gaok mai ngak rah tabiak bala di jalan blaoh klak nduac. Bruk ini oh lac sajanih ngak kan kandah tal bruk karo jalan mbak blaoh nyu daok ngak suh sah duh hatai dalam rahra tuk dom bruk ngak suan hukum jalan bhian rah tabiak baoh oh hu njauk taong bhat. Dalam rilo bruk hu pambuak tal kol co kol klaik, meblah atau njauk bala trak di jalan mbak, ralaoh taka lek radaih lac sa dalam dom asal kadha hu makna daong ka jabat chuc nang duah urang ngak suan hukum. Tuk ralaoh taka radaih njauk pacang atau ngak ja lau, bruk pasang iek, duah thau tani tanat khau tin gaok rilo kan kandah, ngak suai ka bruk duah urang suan hukum saong meda ngak ka urang suan hukum daok di langiui bruk taong bhat.

Sa di dalam bruk lang yah siam njau brei ka bruk pacaga urang pacing lek di talaoh radaih ieu lacbrei dak caik camera ieik jalan tui alkaok (AI) jeng ye hu jammariak jaman barau ieik. Jammariak ini mboh chip lek taka pacing di ralaoh radaih blaoh payua chip brei thau piah taong bhat. Langiu di nan brei pambuak majam camera ieik jalan saong gilang khau tin nagar dan saong pandar tui VNeID daong brei otomatik taong bhap po radaih, khik siam khik njauk bruk taong bhat drah saong dah dai.

Langiu bruk pandar ilamo kong nghe, bruk ramik dom kapul polih jalan mbak peih bruk pasang iek bhian di angaok dom jalan hu makna, abih di nyu nan lac dom labik hu rilo kamera pasang iek, brei daong duah mboh saong langyah samar dom bruk pacang ralaoh taka lek radaih. Gam haong nan, brei padang bruk pambuak di jabat chuc nang saong rahra piah samu duah mboh, khan brei thau dom bruk ngak suan hukum. Tuk hu bruk pasang iek catang meng jabat chuc nang saong rahra, dom urang peih nduac radaih oh khin ngak suan hokum nagar.

Meng akaok thun 2025, tui Sarak taka 168 di Rajaei, tanut taong bhat ngan haong bruk pacang ralaoh taka lek radaih hu tagok rilo. Min tapi, piah patagok bruk gham, brei iek tapa piah pandar dom jalan ngak catang jang yau ye mek harak brei peih nduac radaih suai atah atau mek radaih ngan haong dom bruk ngak suan hukum jalan mbak rilo mbang. Tui bruk taong bhat hu ngak catang, dom urang peih radaih brei sahneng tani tanat tuk si ngak bruk pacang ralaoh taka lek radaih.

Bruk pacang taka ralaoh piah dauk nyaik bruk taong bhat tapa kamera oh lac bruk ngak suan hukum blaoh daok ngak kan kandah trak tal bruk siam mekre, karo salamat jalan mbak saong bruk pacang, caga urang ngak suan hukum. Piah pacang cakak bruk ini, brei hu ba drei tame ngak catang di jabat karja haong dom bruk ngak catang jang, gam saong di nan paglaong ilamo di rahra tapa bruk pathau khan saong pato megru. Tuk adat hukum hu khik kajap, yaok urang thei jeng hu ilamo ngak tui hukum jalan, brei ka bruk peih nduac radaih di jalan dak harei dak hu karo salamat, ilamo jang./.