Harei 11-4, khau tin meng Jabat An ninh mang saong pacang caga kol bleik pandar ilamo jamraik kong nghe glaong, Kong an tinh Tra Vinh brei thau hu bahrau taduan hu harak di sa urang kamei khan brei thau ka bruk hu manuac pachot gat meblah mek labaih 500 trieu dong tuk tut angan tame pakacah “Drap ar Ilamo Ao dhai 2025” hu ba tagok yaih khan angaok intenet rahra mang xa hoi.

Bilan 3-2025, sa-ai kamei hu angan K. daok di ban Tra Vinh mboh Facebook yaih khan ka mbang pakacah “Drap ar Ilamo Ao dhai thun 2025”.

Maong tapa asal di nyu, sa-ai kamei angan K mboh hu ginup kein lagaih nan payua harak tut angan hu mbaok tame pakacah. Tut angan blaoh, sa-ai K hu sa urang taong phone mai ndom mayai lac mek angan “Urang dang peih ngak” piah pambuak bruk.

Urang ini pandar sa-ai K payua khau tin di drei saong binguk rup thaik thaot. Sa-ai K mboh hu jalan link mlaoh tame kapul chat Messenger saong pandar ngak 3 bruk piah hu ginup kein lagaih piah pakacah, meng bruk tame jalan link piah blei saong bayar jien sa blah ao dhai hu yaom 390.000 jien dong.

Hadei di tuk nan, sa-ai K hu bayar gilac paok jien nan saong hu alin veik jien laba. Paok jien hadei nan hu paglaong tagok hadei dom mbang blei ndap nda.

Hadei 2 mbang blei ndap nda blaoh, sa-ai K jeng hu bayar jien gilac ginup saong gam jien pah laba.

Tal “bruk” mbang ka 3, paok jien tagok tal 15,5 trieu dong ye “Gah padang peih ngak” mek makna lac sa-ai K ngak bruk suai, tapa tukvak ba tabiak yau nan ye bruk pathau khan di jamraik lac oh ngak ganap salah blaoh bruk.

Sa-ai K khin mek gilac paok jien nan ye brei payua labaih 96 trieu dong piah pasiam bruk ngak suai dahlau daih. Hadei tuk payua jien nao, dom urang ini patui ngak bruk pathau khan lac kayua tanut tin nhiem biar oh hu ginup 100% saong ieu pandar sa-ai payua jien veik tra.

Dom urang ini pagun sanya hadei tuk salah blaoh ye brei bayar gilac dom paok jien dahlau nan blaoh brei veik jien laba, meyah oh ngak tui ye “Gah padang peih ngak” kareik tai khoan, oh bayar jien nao mai hu.

Duh hatai susah ka bruk lahik paok jien payua nao meng blaoh, sa-ai K patui bruk payua jien. Tuk ini, dom urang daok dalam kapul (biak nao lac kol bleik haong gauk nyu) gam gam payua harak tame kapul lac mek hu jien laba ngak ka sa-ai K dak je tame.

Taong abih jien sa-ai K payua nao ka dom kol bleik nan lac labaih 500 trieu dong. Tal tuk sa-ai K oh daok jien piah payua ye kol bleik cakak chip bruk pambuak talei ndom mayai phone di sa-ai K. Tuk ini sa-ai K meng thau lac gaok pachot pagat saong meng nao tal jabat kong an pathau khan.

Jabat kong an pachreih rahra brei caik hatai caga bruk pachot pagat nan saong oh hu mbaok tame dom mbang pakacah, dom harei raya hu yaih khan angaok mang bo oh ka thau mai meng halei, oh payua jien tui panuac pandar di dom kol bleik.

Oh tame dom jalan link webside drei oh thau mai meng halei, tuk halei jeng thau caik hatai pacang khik tai khoan mang xa hoi, lek taka rup tai khoan ta-eng drei. Dom bruk pachot pagat atau medil lac pachot pagat meblah mek drap ar jien padai, rahra brei khan tagok jabat kong an jaik abih piah hu tacei ba, langyah./.