Yau mboh dalam sa livestream di TikTok, Hằng Du Mục ndom mayai lac kalaok kaca yen sao 70 ml hu padang 30g yen that. Min, urang blei saong urang ilamo jru gah ngak yen sao lac oh njauk tantu. Hadei tuk ngak bruk saong Kapul Yen sao Viet Nam, Nai hu ba tagok sap ndom likau maaf ampun saong thau ka bruk ngak chung dalam bruk yaih khan di drei.

Dreih yau nan, Quang Linh Vlogs jeng hu urang bhap bini ndom mayai lac oh siam tuk yaih khan sa janih keo njam patam baoh karaoh saong panuac yaih lac “1 klaih keo duo 1 jam njam patam”. Hadei di dom panuac cagar nao mai, gait hu likau maaf ampun kayua drei yaih khan oh njauk ngak ka ralo urang maluh dan saong brei thau drei oh ba hatai bluh praong kaya ndap nda.

Luat su Trương Văn Tuấn, Kapul Luat su Ban raya Ho Chi minh, brei thau tui khoan 7 Dieu 109 Hukum Pablei salih 2005, yaih khan chung dalam nan hu bruk pabak khau tin oh njauk ka asar siam, yaom kaom, mai meng halei, paok kadung, pasiam saong dom asal kadha karei di ndap nda, meyit meyao.

Langiu di nan, Hukum Yaih khan 2012 jeng pakauk bruk yaih khan chung ka bruk pablei salih, asar siam, yaom kaom saong dom khau tin pambuak tal ndap nda, meyit meyao. Yau nan ye, bruk yaih khan chung ieu lac ngak suan hukum nagar saong njauk brei pakauk.

LS Tuấn brei thau, urak ini hu biak rilo urang saong kapul ngak bruk yaih khan chung brei ka ndap nda, gaok mai abih tih oh njauk dut haong bruk tapak tantu di ndap nda. Sa dalam dom makna lac rilo labik brei pah meyit meyao yaih khan min oh pasang iek bruk njauk tantu di asal kadha, oh pataom tame kein lagaih saong jalan ngak dui pachreih dak rilo dak siam. Ngak ka urang blei pandar mbuan pang tui dom panuac yaih khan suan, ngak ka urang blei ndap nda oh hu asar siam atau oh lagaih haong hatai khin caong.

Urang, kapul hu bruk yaih khan chung di angaok mang xa hoi brei njauk taong bhat harak gar hanh chinh tui adat hukum di Sarak 38/2021, cambaih laih lac ngan haong menuac urang: Taong bhat jien meng 60 - 80 trieu dong ngan haong bruk yaih khan oh njauk atau ngak ka urang blei pandar thau chung ka asar siam, hu ngak meng halei mai, bruk duh tuai damuai urang blai saong tukvak siam di ndap nda, meyit meyao hu tut angan atau brei thau…

Bruk yaih khan chung daok taong bhat hinh su tui adat hukum nagar di Dieu 197 Hukum hinh su, tui nan urang halei hu ngak bruk yaih khan pachot pagat ka ndap nda, meyit meyao, hu taong bhat hanh chinh ngan haong bruk ini atau njauk taong bhat ka duas ini, oh ka tayah klak bruk ngak chung suan hukum nagar meng dahlau blaoh daok ngak chung ye njauk taong bhat jien meng 10 - 100 trieu dong atau njauk taong bhat oh kareik guk tal 3 thun.

Langiu di nan, urang hu bruk ngak chung hukum nagar daok meda njauk taong bhat jien meng 5 - 50 trieu dong, njauk pakauk ngak bruk atau ngak sa bruk halei nan meng 1 – 5 thun…/.