Bilan pandiak ieu lac tukvak hatai caong nao jirah rivang rilo, jeng lac tukvak pachot pagat tapa mang tagok jeng tagok rilo. Rilo urang njauk pagat tuk kakei blei pah bilik daok, harak ahaok par, tour jirah rivang tapa dom blah web ngak ja. Sa dalam dom mbang gat pachot bahrau jaik ini ieu lac bruk lahik labaih 1 ty dong tuk urang pah bilik daok tapa sa fanpage hu tick hijao di sa labik padeih padei di Ninh Bình.

Tui panuac urang khan di urang, hadei di tuk bayar jien mbang akaok meti, kol bleik pandar sa-ai kamei bayar gilac jien kayua lac kayua payua chung. Pagun sanya brei bayar gilac paok jien payua suan, kol bleik patui veik plue urang peih kadung ndien tu VNPAY, tame ngak tantu cambaih pasang mbaok meta piah mek gilac paok jien bayar meng blaoh. Min, biak nào, lek taka hu atah 9 baoh ini lac paok jien bo urang bayar nao yaok mbang meng tai khoan lek taka gilang pariak di drei.

Ini lac sa di dalam rilo bruk sanak jak bo kol bleik pandar piah blah mek drap ar jien padai di urang. Dalam bruk ini, tok hadei dom mbang “bayar jien piah mek gilac”, urang lahik labaih 1 ty dong kayua jie tame panuac pagun sanya yamen bingi di dom kol bleik.

Langiu di bruk bahrau bau nan, oh takik urang karei njauk pagat dalam dom bruk meyao meyit kakei pah bilik jirah rivang, kakei blei harak ve ahaok par atau tour jirah rivang tapa dom blah web ngak ja. Dom kol bleik pachot pagat bhian ba tabiak dom danak dak lagaih, patrun yaom jien, alin pagam var mbang atau radaih ndik nao mai oh mek jien pieh dui pachreih urang bayar jien dahlau.

Tui Kuk An ninh mang saong pacang caga kol bleik pandar kong nghe glaong, Mentri Kong an, dom fanpage hu tick hijao jeng meda jeng sa bruk piah pachot pagat. Dom kol bleik bhian salih angan fanpage saong ngak bruk pachot pagat meng dom labik yau Campuchia. Yaom lac yau nan, bruk pasang duah iek jeng daok patui veik saong dom jabat chuc nang hu kakei rahra brei biak caga tuk bayat jien online.

Abih di nyu nan lac, tuk gaok dom panuac pandar bayar jien meng dom tai khoan kongti “bhut kamalai” atau oh pandar ngak tantu cambaih laih mbaok meta, rahra brei caik hatai caga. Rilo bruk pachot pagat hu duah mboh tuk rahra gaok kan kandah atau hu kadha ba tagok kakei caga angaok dom nen tang mang xa hoi.

Tui kuhria di karja, pachot pagat tapa intenet mang daok ieu lac bruk ngak kandah praong tuk tok dalam thun dahlau, rahra dalam negar njauk mabuh tame pachot gat labaih 18.900 ty dong. Piah plaih caga hu urang gat di dom bruk ini, rahra brei paglaong bruk caga saong caik hatai pasang iek khau tin tapa dom gah hu angan je dahlau tuk ngak dom bruk meyao meyit online halei./.