Tukvak bahrau di ini mada rah tabiak bruk tuai damuai pang hu mbang taong phone ngak mangak angan, taong phone min oh ndom hagait, oh mahit hagait, gindang jua… ngak cauci brei ka ralo urang. Mada jeng hu rilo urang pachot pagat, brei caik hatai caga.

Jaik di ini, rilo urang pandar phone ndom ka bruk bhian pang dom mbang hu taong phone mai di lek taka phone oh krein min tuk pang phone ye oh mboh ndom mayai hagait, mboh gindang jua. Bruk ini meda mai meng bruk gaok kan kandah di gah ky thuat atau hu kol bleik taong phone mai piah ka urang taong phone gilac ka nyu. Tuk nan meda njauk lahik jien vien thong biak glaong oh bhian mboh.

Bruk nan bhian hu ieu lac “taong phone piah plue”, daom mbang taong phone samar blaoh padam, piah ka urang mboh mbang taong phone nan bo taong phone nao, blaoh njauk lahik rilo jien dalam dom minit katut blaoh oh hu pang mboh thei ndom mayai hagait.

Bruk pachot pagat ini hu rah tabiak biak rilo di Mỹ saong di dom negar di gah chau Au meng sa pluh thun dahlau saong urak ini nyu rah tabiak gilac, ngak duh hatai ka tuai damuai di dom sang majam phone. Bruk pachot pagat ini hu dom blah harak mbao dalam negar jeng yau dunya hu kakei dahlau.

Mboh lac dom kol bleik nyu pandar sa janih ndap kaya piah ngak dom mbang taong phone tal yaok trieu taka phone di dong dalam dunya. Taong tame bruk randap bhian gaok meng nan tal ini di urang pandar phone, nan lac bruk taong phone nao tuk hu taka phone taong mai. Bruk ini pachot pagat hu biak rilo urang. Jaik abih dom taka phone bhian biak kan si thau, kayua nyu dreih yau taka bhum phone di dom labik di Viet Nam.

Urak inu dom bruk pachot pagat tapa mang xa hoi saong internet dak harei dak ralo janih kadha, oh sa janih dalam bruk online blaoh daok peih praong tapa dom mbang taong phone haong rilo bruk kan si thau dahlau.

Kayua yau nan ye, Kuk An toan pakaro khau tin (di Mentri Khau tin saong dakvah Truyen thong) kakei rahra caik hatai meyah mboh mbang taong phone mai meng lek taka phone oh njauk taka phone drei thau atau oh njauk lac sa taka phone bhian mboh atau oh pambuak tal sa kapul atau labik halei, brei caik hatai caga, oh pang, oh ngak tui panuac tacei ba di kol bleik oh bhian thau krein.

Oh brei thau khau tin di drei tui sa jalan halei atau oh tame dalam dom jalan link drei oh krein hu payua mai. Dalam bruk jeng urang njauk pachot pagat di kol bleik, rahra brei khan brei thau samar drah haong Kong an piah hu daong saong langyah samu dil./.