Thuong ta Nguyễn Thăng Long, Phaok Akaok Tham muu Kong an Ban raya Ho Chi Minh brei thau, bruk bhian ngak bo dom kol bleik dalam jalan talei bleik gat di angaok internet lac bruk “akaok karot saong anek lừa”. Akaok meti, gah buh jien tame hu ieu da-a tame dom paok meyao meyit yaom biar, mbuan thuak jien saong hu laba. Hadei di nan, dom paok meyao meyit ini hu patagok pakat rah rah. Tal sa tabung halei, tai khoan “oh pandar hu veik o”. Tuh gah buh jien njauk palai jien, gaok mai abih mbong jien, dom kol bleik patui veik ngak tabiak dom kadha pagun sanya piah urang buh jien tame veik piah caong khin mek gilac jien klak lahik. Tal tuk gah buh jien oh daok khik kajap ka jien padai, dom kenh piah duah taom gaok ndom meyai njauk cakak abih.

Pagap ye bruk di kol bleik hu angan Phó Đức Nam (daok ieu lac TikToker Mr. Pips), hu jabat karja cap mek di bilan 10/2024. Tuk cap mek, jabat chuc nang duah pasang saong mek hu rilo drap ar di ong Nam haong kapul pambuak, hu abih tih labaih 5.300 ty dong saong cap makamah 31 urang. Kapul ini hu padang tabiak haong pasang iek 5 blah internet hu mbaok meta meng sap Anh, ngak ka urang hu mbaok tame nda lac meyao meyit angaok dom labik dunya. Biak nao, dom blah internet ini hu caga dahlau haong pambuak haong dom tai khoan gilang pariak di dom kol bleik dalam jalan talei. Urang ngak dalam jalan talei hu pandar ngak jeng rilo gah piah ndom meyai haong gah buh jien tapa dom blah internet yau ye Facebook, Zalo saong Telegram.

Di harei 17/1/2025, amuk L.Th.H, daok di Ban raya Ho Chi Minh, hu khan haong jabat karja bruk buh jien haong gaok kol bleik meblah jaik 1 ty dong. Tui panuac khan di amuk L.Th.H, tapa Facebook, amuk hu cuak yut haong ndom meyai haong tai khoan angan "Nguyễn Thị Hồng Nhung". Hadei sa tukvak, urang ini da-a amuk buh jien tame tapa sa blah web. Ngan haong panuac yaih khan bingi pang, amuk H ngak tui tacei ba, padang tai khoan saong buh jien tame, buh tame 500 trieu dong haong panuac pagun sanya lac hu mek hu 1 ty dong.

Tuk amuk H. caong khin thuak jien laba, kol bleik pandar ieu amuk buh jien tame 200 trieu dong dalam tukvak 5 mon haong pandar buh jien blei bao hiem jien payua 100 trieu dong. Jie tame, amuk H. patui hatai buh jien tame 300 trieu dong, min tapi hadei di nan oh meda thuak jien hu meng jien takai tal jien laba blaoh amuk buh tame. Tal tuk ini, amuk H. meng thau lac drei njauk pachot pagat meblah jien padai. Hadei di nan, amuk tame gilac tai khoan min tapi oh tame hu kayua tai khoan njauk pacang cakak. Tuk amuk tame hala web yaih khan ieu da-a buh jien, amuk oh tame hu kayua blah web njauk yah blaoh.

Piah caga klah di gat klah di bleik di internet, Thuong ta Nguyễn Thăng Long kakei caga, rahra brei paglaong bruk caga, bhian pasang iek, duah thau khau tin pathau khan meng dom blah web hu angan je ndom ka jalan haong bruk ngak di kol bleik. Oh brei thau khau tin di drei, thaik thaot kat can cuoc, kat bao hiem y te, harak radaih atau dom harak hu khau tin di drei haong urang tagok angaok internet. Ngan haong dom bruk buh tame jien padai angaok internet, rahra brei duah thau tani tanat khau tin saong tok buh jien tame dom labik meyao meyit hu angan je hu dom jabat karja mbaoh tangin brei ngak. Dahlau tuk buh jien tame, rahra brei nao tapak tal dom jabat meyao meyit, pasak piah hu pathau khan saong pasang iek khau tin.

Dahlau di nan jabat karja jeng pachreih rahra juai je tame dom panuac ieu da-a buh jien tame hu laba glaong, oh hu mbaok tame dom kapul kandauk atau kapul online tui sa jalan halei tuk oh ka thau cambaih laih angan haong angan je di nyu; oh payua jien ka nyu atau kapul drei oh krein tuk oh ka thau tani tanat ka tantu angan je di nyu./.