Akaok thun 2025, jabat kong an taong tayah gam jalan talei online pachot pagat taong tame urang pandar phone, dalam nan rilo abih di nyu hu kol bhian ngak ja jabat pasang iek yau jien je, kong an, meyao meyit karja… piah tame lek taka angan urang, co blah mek jien di urang. Kong an Ban Ine Ha Noi jeng mek hu urang bhian ngak ja shipper piah pachot pagat urang bayar jien tapa banking. Yaom lac yau nan, bruk pachot pagat tapa online jeng daok hu rilo salih bahrau, karei, pakatuak drei.

Payua khau tin pathau khan ka bruk di drei ka blah web Chongluadao.vn, urang njauk pachot pagat hu lek taka phone 0828064xxx khan brei thau: “Jaik di  ini hu sa urang pandar Telagram meng negar langiu hu payua harak ka dahlak hulin ndom mayai lac nyu hu dom Bitcoin, min kayua bruk thuak jien di Algeria njauk pakauk yau nan likau dahlak hulin thuak jien saong payua ka nyu, hadei di nan dahlak hulin hu 15% jien dalam paok jien nan. Min paok jien nan oh hu payua tapak tal dahlak hulin bo payua tapa lek di website “nordepass”. Kayua chreih ka jien laba choh, dahlak hulin ngak tui panuac likau daong di nyu, min tuk dahlak nao thuak jien ye oh ngak hu. Dahlak hulin sua tangi urang ngak bruk di blah web nan ye urang nan ndom meyai lac brei buh jien tame takik abih labaih 50 USD. Hadei tuk dahlak hulin buh jien tame blaoh ye nyu patui veik pandar dahlak hulin tagok pakat tai khoan premium, Tal tuk ini dahlak hulin mboh meng thau bruk ini lac kadha pachot pagat. Bruk njauk caik hatai sangka lac dahlak hulin hu brei thau khau tin di drei nan oh thau hu gaok bruk hagait veik tra”.

Sa urang njauk urang pachot pagat karei khan lac: “Urang pachot pagat mek khau tin saong thaik thaot bruk radaih oto di dahlak hulin njauk taong bhat hadei kayua kamera mek binguk, blaoh payua harak tapa Zalo ka akau dahlak, tacei ba dahlak hulin klick tame jalan link blaoh kol nyu payua tapa Zalo piah dahlak hulin ngak tui tacei ba buh jien bhat. Dahlak mboh ini dreih yau bruk pachot pagat nan oh tui hatai payua jien nao. Meda hu rilo urang oh thau blaoh klick tame saong ngak tui tacei ba di kol nyu blaoh njauk hack phone atau hu dom bruk paoh blah karei”.

Ndom tal bruk taong tame mạng internet thun 2025, Kapul An ninh mạng VN ndom meyai lac “Taong tame tapak APT, kol bleik spyware saong mã hoá dữ liệu ndok blah mek jien ransomware jeng lac bruk taong tame hu ngak rilo; dalam tuk dom majam jamariak pandar ngak kong, radaih nduac ta eng, ndap nda par oh hu urang pandar lac sa pandap mbang bingi bahrau di urang klaik khau tin. Gam tui di nan, bruk ngak ja, pachot pagat di online jeng ieu lac sa bruk hu ngak rilo di abih taong tame dom urang oh hu rilo ilamo bhian thau mboh, oh hu ilamo ka gah taka so; urang pachot pagat bhian pandar thaik thaot, ngak kong jammariak ngak ja yut cuai sahabat, urang dalam baoh sang piah paoh blah paok jien praong biak mbuan lagaih.

Ong Võ Đỗ Thắng, Yam ndok Pasak khan brei thau an ninh mạng Athena, ndom meyai lac “Jaik ini hu mboh dom bruk urang pandar ba khau tin di drei, khau tin jabat, khau tin kandauk bruk pablei salih… ba tagok sua tangi tri tue nhan tao (AI) caong khin AI khan pato tacei, ba tabiak jalan langyah. Bruk kan kandah pak di ini ieu lac dom khau tin kandauk ini hu AI taduan, khik piah saong meda tal harei halei, AI ngak brei ka urang karei mboh khau tin saong ngak cagar gilac po user hu je tame pandar AI khan brei thau. Kayua yau nan ye, brei njauk caik hatai ngak, oh pandar AI pato tacei khan brei thau dom asal kadha di rup drei”.

Yau ye ndom mayai mblaoh, ong Ngô Minh Hiếu, sa urang jru gah an ninh mạng daok dalam danak dak Chongluadao.vn, pakakei lac: Dahlau tuk pandar AI di DeepSeek, urang pandar brei duah thau camabaic lac dom bruk mbuan kanjah jhak hu pambuak tal bruk brei pakandauk ta eng drei; brei pasang iek dom pathau khan meng jabat piah thau dom bruk kakei dahlau hu pambuak tal DeepSeek. Njauk abih di nyu, urang pandar brei takik pabak khau tin mbuan ngak jhak tuk pandar AI saong khik kajap lac drei tok mek pandar meng dom gah njauk drei je tantu./.