Hadei dom harei padeih padei raya Tet yaom lac rilo jabat, kongti, xi nghiep hu gilac mai tame ngak bruk, min bruk peih nduac radaih di Ban raya Ho Chi Minh mboh saron mbon tani tanat jang, oh rah tabiak bruk gar katian jalan dui atah yau bhian mboh meng dalau.

Sa-ai kamei Minh Vy daok di quan Bình Thạnh brei thau, masa dom tuk wak masa jaik di ini mai mboh tukik jang urang peih radaih nduac tagok mbaok ar jalan piah ka urang nao tabak takai piah vaih tapa jalan karei. Mbaok Jalan nao mai di takai anak kadai kuan kaphe di sa-ai mboh laneing lanoi jang, lagaih ka bruk pablei salih jang:

“Dahlak hulin mboh bruk peih nduac radaih angaok jalan jaik ini hu siam lagaih jang. Bruk rahra ngak siam tui hukum jalan mbak jeng ngak ka labik pablei salih, jalan caik ka urang nao takai nao tabak di dahlak hulin jeng laneing lanoi jang.”

Thuong ta Lê Văn Hải, Phaok Akaok Jabat Canh sat Jalan mbak - Kong an Ban raya Ho Chi Minh taong yaom lac, Sarak 168 hu ngak salih ilamo di rahra, paglaong ilamo ngak njauk Hukum Jalan mbak jang. Pagap brei ka dom bruk salih siam lagaih hadei di labaih sa bilan ba tame pandar tui Sarak 168 di Rajaei, Thuong ta Lê Văn Hải brei thau, bruk njauk bala di jalan mbak hu dui takik rilo dalam di 3 asal kadha dut haong tukvak ini thun 2024. Thuong ta brei thau:

“Cambaih laih dalam dom tukvak tabung glaong, di dom jalan pasak dalam ban raya, bruk peih nduac radaih di jalan mbak dang cang gom jalan biak siam lagaih, dang njauk tanut cih di ngaok jalan. Dalam nan mbaoh ilamo peih nduac radaih hadei di menyum alak, mbie dak harei dak hu mboh uak siam jang.”

Oh ndom mayai karei hu lac Sarak 168 tuk barau ba tabiak ngak ka katian radaih di akaok jalan, min tapi tui ong Nguyễn Vũ Hạnh Phúc, Akaok jabat Mban karo jalan mbak Ban raya Ho Chi Minh ndom mayai lac, Sarak ini daong ka bruk peih radaih angaok jalan mbak hu tani tanat, karo siam mekre jang. Ong Nguyễn Vũ Hạnh Phúc jeng ndom mayai lac bruk salih glao akaok ilamo saong bruk brei bhian randap di urang peih nduac radaih meng di tuk hu Sarak 168 jeng ieu lac sa baoh asal kadha:

“Tapa langyah, tuk tanut taong bhat tagok ye glao ilamo di urang peih nduac radaih jeng hu salih, oh daok bubap har var samar drah nduac truh tanut jalan brei adat. Bruk pandar Sarak 168 hu taong yaom lac tok sa adit mada hu cuang kandah min, tapa sa adit patui ye bruk di angaok jalan mbak hu tani tanat bhian biasa.”

Siam lagaih di Sarak 168 ka bruk taong bhat urang ngak suan hukum jalan hu taong yaom glaong. Tapi Min, tui akaok jabat Mban pakaro Salamat jalan mbak Ban raya Ho Chi Minh Nguyễn Vũ Hạnh Phúc jeng daok dom asal kadha brei patui sangka saong pasiam, yau ye: paglaong ilamo di rahra ka dom adat hukum bahrau di Sarak; pasiam, paglaong gom tacei jalan mbak, ralaoh pathau khan jalan mabak…/.