Di ban Cà Mau hu ralo urang mada njauk bala kayua pang urang bleik blang ngak brei lahik jien bih dom tỷ đồng. Yau ye saai L. daok di ban Cà Mau khin nao Korea ngak bruk, duah urang daong ngak maha, daong ngak harak gal. Duah tui di angaok rayak intenet, saai L. pambuak haong sa urang pok rup drei urang bhian ngak harak gal brei ka urang nao Korea di Facebook. Saai L ngak harak brei ka 2 diuk pasang gam nao, nyu lac yaok sau rang bayar 30 triệu đồng. Tapi min, hadei di brei jien gok blaoh gait oh pambuak hu haong facebook nyu tra. Saai L. khan lac yau nan:“Bahrau akaok camareip urang khan mek jien 30 triệu, adei caik gok dalau 30 triệu, barau ndom mayai meng page baharei nyu padrak caik jien takai, lac brei ngak harak gal ka drah samar. Mboh nyu kakei panuac biak chreih, dua klau harei brei tabiak visa, oh thau dalau bala bleik salih”.

Yau ye nai T. Meng bilan 11/2023, nai T. pambuak haong Facebook angan Trần Gia Khang. Hadei di nan, facebook ini yaih khan ka saai yao mayit main chứng khoán haong jak nai T. “buh tame tukik min raba glaong”. Hadei 2 mbang buh tame, nai T. mek hu jien baya raba njauk masa, tal mbang ka 3 tuk nai buh jien ralo jang ye Facebook di Trần Gia Khang haong majam mayit điện tử mek ralo janih kadha piah ka nai T. buh ralo jien tame meng hu raba. Nai T. payua tame labaih 7 tỉ đồng, tal ini lahik abih saat.

Sa janih bleik blang karei nyu mek angan jakar, urang ngak bruk di jabat karja, ieu brei khan angan jie rup drei. Yaom lac daok ngak harak piah lakau jien daong oh bruk ngak haong suak jien bảo hiểm xã hội. Nai oh thau yau habar kon langiu thau hu khautin di drei, nyu mek angan pasak mayit nao mai gah bruk ngak ieu phon ka saai cap brei thau paganap harak gal meng mek hu jien. Huac kanda di bleik blang, nai K. pambuak haong pasak dan hu thau cara bleik blang. Nai K. khan brei thau:“Ieu phon lac kadha brei thau dalam harak gal rup drei oh tantu, nyu ieu brei thau lek angka kat paangan haong angan gilang jien. Pagap pakre ka ganap, meng suak hu jien bảo hiểm oh hu bruk ngak, oh ngak mada lahik jien. Kon nyu daok pachrot drei lac tapa bilan 7 oh ngak hu”.

Tukwak masa meng blaoh, ralo jabat di ban Cà Mau jeng mek angan urang haong dom cara taka yau nan. Dom jabat ini papar khautin brei ka bhap bini caga. Muk Quách Thanh Thoảng, Akaok Pasak Dịch vụ bruk ngak tỉnh Cà Mau brei thau:“Akau ndom tapak haong urang ngak, urang daok di bhum palei ieu lac dom khautin barau bau yau nan oh njauk mai di Pasak mayit bruk ngak. Rup Pasak kon hulin dahalak caong khin urang ngak njauk caik hatai dalam bruk brei khautin di drei di dom janih yau ye: laoh kat rahra, angka lek di gilang jien di drei brei ka urang ieu mai”.

Meng akaok thun 2023 tal ini, Polih Cà Mau cap mek 51 bruk urang khan brei ka bleik blang di riyak intenet ngak lahik bih labaih 60 tỷ đồng. Polih Cà Mau brei bhap bini caga, brei caga tuk hu urang ieu phon maim ek angan lac urang jakar karja, pambuak mek khautin; Caga tuk tame ngak bruk di atah, buh akaok jien tame chứng khoán, đa cấp (ralo pakat), tiền ảo (jien mek angan)…; Paglaong glao akaok caga tuk mayai ndom mayit nao mai di intenet, juai khan parabha khau tin di drei ka kon karei; Juai jie thei urang yaih panuac paluo daong mek jien piah bleik blang./.