Palih ruah pajaih pagam: Meta dhar pajaih brei mek meng dom phun amaik hacih halak, hacih ruak, baoh rilo, praong siam. Brei mek meta pagam meng dom dhar tamuh tapak meng phun, oh mek dhar jung phun, dhar tamuh gah ala phun.

Dhar ngak pajaih brei kaoh katut, yaok mbaik atah meng 3 tal 4 tuk hala, atau meta di nyu. Saong brei mek dom mbaik dhar hu sambo katam jhuk. Oh mek dom mbaik dhar taha ngak pajaih. Siam di abih brei mek caduk dhar taha, piah hadei tuk pagam meta samar tabiak caduk.

Njauk caik hatai: Dom dhar kaoh tabiak blaoh, brei kak tui paok, gha tui gha, jung tui jung, blaoh papaok dalam khan cotton tathah, caik labik lahei, piah pagam dalam 1 tal 2 harei.

Ilamu pagam: Siam di abih lac pandar ilamu tame pagam dhar. Tukvak brei pagam dhar meng bilan 2 -3 atau bilan 7 -11 tui saka ia bulan. Dahlau di tuk pagam pajaih meng 25 -30 harei, brei buh khah ka phun pagam dhar gha nyu khang kajap, rilo katak, piah mbuan pagam meta tame dhar pagam.

Jalan pagam: Angaok phun pagam dhar, cakak klaak meng jung phun trun tal rup phun hu sambo mau katam jhuk atah labaih 40cm, min brei caik veik dom hala piah ka phun mek ia harei. Hadei di kaoh mbleing meng gah gha tagok, ngak jeng sa pabah pagam atah meng 2,5 tal 3,0cm, praong meng 25 tal 30 độ.

Angaok gha di dhar pajaih jeng kaoh pabah praong dreih yau nan, min kaoh cagar veik saong labik kaoh praong 60 - 65 độ. Pagam labik kaoh dhar pajaih saong phun pagam tame gauk, mek talei nilon pambuak veik saong kaving vin labik pagam dhar meng 5 tal 6 mbang biak kajap vil val labik pagam, blaoh dui tapak talei nilon papaok sir dhar pagam saong labik pagam, plaih ia hajan saong ngin tame dalam. Hadei di tuk pagam meng 20 -30 harei tui bilan , meta pajaih nyu tamuh caduk meda. Iek glang phun pajaih hadei di tuk pagam: Hadei di tuk pagam pajaih labaih 2 bilan, caduk meda tamuh atah meng 15 tal 25, dom hala salih tapa sambo hijao jhuk, meda ba pablei hu. Dalam tukvak ini, njauk pruh ginup ia, buh ginup khak NPK, cakak klak dom caduk tamuh langiu meta pagam dhar. Tui iek piah samar pacang dom halak palai pajua pambak ruak thán thư, pluh hala , rầy pa-ok./.

Urang lang: Ai Nghiem -30/6/2021