Danao raong brei ngak khang kajap saong tauk blah HDPE

Ong Chính brei thau, 2 thun dahlau tapa báo chí saong harak gar di PGS Hoàng Tùng ka bruk ngak tui công nghệ Biofloc saong bruk daong gah kỹ thuật di Cty Mekong Tomland, ong khang hatai buh jien blei blah nylong tauk danao raong ngak tui jalan meteh Biofloc (daok ieu lac Chinh floc). Dom mbang raong dalam thun 2015, 2016 jeng brei mboh siam lagaih, taeng thun 2016 meng 5 danao raong hadang praong labaih 6 rabau m2 mek hu 78 tấn dalam 4 mbang raong, saong hadang praong jaik 70 drei sa kg, laba hu labaih 35% jien buh tabiak.

Tui ong Chính, danao raong brei ngak khang kajap saong tauk blah HDPE, vil val danao raong brei hu pacang meng daning, halam pasei, saong hu sa blah nylon glaong 30cm piah pacang cakak dom hareik hareim meng gah langiu. Yaok danao njauk hu sa mac brei mbang tự động, 5 dàn mac kandik ia, 1 dàn khí oxy ala mbat, jalan njuk ia gah ala meng bingun manuac ngak, bể halang cagar viek saong brei hu labik tram, jamriak njuk vi sinh bán tự động.

Dalam tuk ngak pasiam danao raong njauk taoh thu ia, rao hacih ala binek, pabu ka pametai anek ruak, pasang iek dom mac kandik, jamriek, bạt saong njuk ia meng danao tapa labik halang ia blaoh tuh tame binek raong …

Ong Chính daok brei thau lac, tukvak palao anek pajaih bhian di dah page saong palao raong meng 150 - 200 drei sa m2 di danao raong saong 500 - 700 drei di danao pabam. Tukvak hadang daok sit meng 1 - 30 harei ye ong Chính brei mbang meng tangin, tuk hadang praong labaih 30 harei meng brei mbang meng mac tự động.

Tuk raong pabam vi sinh ngak jeng floc, ni hu maong lac tukvak praong dalam bruk raong hadang tui jalan meteh Biofloc di ông Chính. Vi sinh saong ia saradang hu tram tapa melam saong buh trun danao, saradang hu pabak 3 mbang sa adit nan ye samu mateh dom pandap mbang pandar dalam adit, bhian di nyu pandap mbang yaok harei labaih 50kg sa danao ye meng mboh Biofloc.

Dalam 60 harei palao camriep, meyah lahik floc, tảo meda ndon tagok, kayua yau nan ye njauk samar salih ia raong hadang piah ngak patrun patakik tảo. Meyah danao ia hu Biofloc tamuh siam ye njuk tapa 10 - 20cm ia piah pabam Biofloc ka binek gaok kan kandah, bloh pabak ia saradang saong brei tagok dom kadik peih. Meyah bọt patih ndon tagok mbaok danao saong oh ralai ye hàm lượng dom janih ralai dalam ia daok di tanut glaong, manuac raong njauk cakak trun chip pandap mbang. Dom bruk gah alam môi trường bhian rahtabiak di bilan raong ka 3 tuk sinh khối di hadang raong praong, tachrauk nerak tamuh tabiak di dalam nan jeng tagok samar kayua yau nan ye bhap bini njauk caik hatai pasang iek siam lagaih bruk raong dalam tukvak ni..

Bruk raong hadang tui jalan meteh Biofloc atau daok ieu lac Chinh floc di ong Lê Minh Chính urak ni daok hu pandar siam di rilo tinh, ban hu taneh raong praong yau ye Bạc Liêu, Vũng Tàu…

Urang lang: Thu Thảo – 28/10