Rilo bhap bini mai rivang iek bien pala njam dalam aia

Bein njam that hijao dalam sang di Hợp tác xã njam hacih Tiến Phát hu chứng nhận VietGAP. Rilo janih njam mbang hala hu pala yau cải thìa, njam sabei, xà lách… Akaok mereip, asal pajaih hu caik tame mút pasah piah nyu pacah meta, tamuh jeng phun anek. Hadei di 10-12 harei, phun anek hu ba tagok mejam hu aia nduac nao mai. Jamriak bơm njuk aia pruh ka dom janih njam dalam kệ pala piah khik ka njam tamuh siam.

Dut haong pala angaok taneh haluk, bruk pala njam dalam aia takik abih pren yava jang, pala suan bilan hu, tagok năng suất, takik halak halin. Abih di nyu lac, oh pandar jru khik caga phun pala, tok pandar bẫy keo piah cap mek halak halin… Lingiu di nan, hợp tác xã pandar mblang taneh ala kệ pala njam dalam aia piah pala ngò gai. Kayua janih njam ini takre halui, tamuh siam  tuk hu ngak hareik, buh khak saong pruh ginup aia.

Yaok 100 m2 sang màng, ye yaom jien buh tame tuk akaok mereip jaik 100 triệu đồng. Meng mblang taneh 1.400 m2, HTX pablei tabiak darak pasar 80 - 120 kg njam yaok harei, ngan haong yaom 16.000 - 20.000 đồng/kg. Daok ngò gai nan lac 28.000 đồng/kg. Kuhria rah tapa yaok bilan mek tame hu yaok pluh triệu đồng.

Tui urang pal akaok UBND xã Vũ Hòa, puac bilan 8/2019, Hợp tác xã njam hacih Tiến Phát hu padang tagok ngan haong 9 urang hu mbaok tame, lingiu di bruk pala saong pablei salih dom janih njam pala dalam aia, daok hu pablei  pandap panda, dung dịch pala njam saong jao brei ilamu kỹ thuật. Meng mblang taneh 300m2 tagok jeng 1.400 m2 sang màng pala njam dalam sa thun brei mboh jalan pala njam dalam aia ba mai rilo kein laba, pabak hatai caong khin njam hacih sa-at ka urang blei mbang. Kayua yau nan ye, karja pachreih bhap bani pala njam hacih sa-at piah rik daong padang angan kaya nong di xã./.

Urang lang: Jasi – 07/09