Sa-ai Nguyễn Ngọc Cương daok tuh aia ka phun pala

Thun 2017, sa-ai Nguyễn Ngọc Cương (ndih tapui thun 1981) lac sa dalam dom baoh sang akaok mereip pala darum tui chuẩn VietGAP. Tui sa-ai Cương, pala darum tui chuẩn VietGAP brei ngak catang jang dut haong jalan ngak meng kan bo urang nong jeng daok ngak. Caong khin ka darum mek hu chất lượng glaong, brei baoh prong langiu di bruk buh khak meng tuk phun tabiak bingu, bhian tambok gha saong ngak pachoh taneh caik ka gha phun cakrok patagok saong cakak klak dom dhal hala jaik takai gha piah ngak laneng lanoi ka phun saong daong ka phun raong baoh.

Darum di sa-ai rilo meng hu buh khak bhau saong khak van ro, atau pruh meng aia ratak nành, takik pandar dom janih khak hoá học. Tuk bingu ndam jeng baoh, sa-ai pandar kadung mbao ni-lon piah tapaok veik yaok baoh, plaih njaik halak halin nyu palai kaik atau bimao ngak bruk baoh. Nan ye baoh darum tuk paik baoh mboh mek mata jang, pachreih urang blei mbang.

Urak ini, labik pala darum hacih Tâm Anh di sa-ai Cương pala hu jaik 900 gha darum nữ hoàng saong darum Đài Loan angaok mblang taneh 1ha, sản lượng mek hu jaik 30 tấn sa thun. Yaom pablei pak bein meng 30-35 ribau đồng sa kg darum. Hadei di kaoh abih phun jien buh tame, sang sa-ai laba hu meng 150-200 triệu đồng yaok thun. Oh padeih pak nan, urak ini, sa-ai Cương haong hadiuk daok pasiam veik taneh piah pala pabak 200 gha darum hatai bhong oh hu asal saong darum hatai bhong AT36.

Meng kreh thun 2018, labik pala darum Tâm An di sa-ai Cương hu brei harak chứng nhận VietGAP, hu jeng labik pala darum VietGAP akaok meti di tỉnh Quảng Bình. Urak ini baoh darum hacih di sang sa-ai Cương hu parang pablei di rilo siêu thị dalam tỉnh. Abih di nyu lac, labik pala darum VietGAP di sang sa-ai Cương daok hu rilo bhap bani pak ini mai bac megru piah pala, piah tapa truh kathaot, pasiam rai diuk.

Tui ong Lê Quang Hạnh, Akaok kapul urang nong xã Lý Trạch, bruk pala darum VietGAP di sa-ai Nguyễn Ngọc Cương hu ngak salih jalan saneng di rilo baoh sang urang nong dalam xã ka bruk pandar ilamu khoa học-kỹ thuật tame phun pala, anek athur raong. Dalam tukvak anak tal, xã meda kham merat jak ba dom baoh sang pala darum dalam xã mai rivang iek, bac megru jalan ngak di sa-ai Cương, tapa nan salih tapa pala darum tui chuẩn VietGAP, pamong tal bruk dak padang Hợp tác xã darum hacih di xã Lý Trạch./.

Urang lang: Jasi - 25/3